«Ռազմագերիների վերադարձման տարբերակներից մեկը նրանց արժեքավոր տեղեկատվության դիմաց փոխանակելն է». Արամայիս Աղաբեկյան

Արցախի ԱԺ պատգամավոր Արամայիս Աղաբեկյանի ֆեյսբուքյան գրառումը. «Ադրբեջանից հայ ռազմագերիներ ստանալու երկու աշխատող մոտեցում կա։ Առաջինը՝ բռնությանն ու մարդ առևանգելուն պատասխանել նույն կերպ, ապա փոխանակել, ինչը 90-ականներին կիրառվել է և արդյունք տվել։ Երկրորդը՝ այդ մարդկանց արժեքավոր տեղեկատվության դիմաց փոխանակելն է, ինչը առաջարկում է Սամվել Բաբայանը։
Նա իր վերջին հարցազրույցում ասաց, որ քարտեզագրել է թշնամու զանգվածային թաղումները և փոխանցել դրանք ՀՀ անվտանգության մարմիններին։ Ադրբեջանական կողմը տարիներ շարունակ բարձրաձայնում է 3,800 անհետ կորած մարդկանց մասին։ Սա հնարավորություն է նրանց հարազատների համար, իսկ փոխանակումն Ադրբեջանը կարող է ներկայացնել սեփական հանրությանը որպես հանուն ժողովրդի արված քայլ, միջազգային հանրությանն էլ Ալիև ախպերը սա կվաճառվի որպես մարդասիրություն։
Առաջին տարբերակի մասին խոսելն անիմաստ է, քանի որ ՀՀ ներկա իշխանությունը «շառից-փորձանքից» հեռու է և կողմնակից է «ամեն ինչ հանուն խաղաղության» կոնցեպտին։ Սակայն երկրորդ մոտեցման համար մի քանի կարևոր խորհուրդ կա, որոնք պետք է հաշվի առնեն անգամ «առանձնահատուկ խելքով աչքի չընկնողները»։
1)Տեղեկատվական տարածում – Ռուսալեզու և ադրբեջաներեն տեղեկատվական ալիքներով մաքսիմալ տարածեք այն, որ պատրաստ եք փոխանակել Սամվել Բաբայանի փոխանցած քարտեզները ռազմագերիների հետ։
2)Պաշտոնական հայտարարություններ – Բարձրաստիճան պաշտոնյաների մակարդակով հայտարարություններ արեք այս մասին, որպեսզի ադրբեջանական կողմը ստիպված լինի արձագանքել, և թեման ներթափանցի ադրբեջանական հանրային դիսկուրս։
3)Անհետ կորածների հարազատների ակտիվացում – Գտեք անհետ կորածների հարազատներին, հատկապես նրանց, ովքեր արտերկրում են։ Խնդրեք, առաջարկեք, շահագրգռեք, որ նրանք հանրային մակարդակով դիմեն Ալիևին՝ գնալու այդ քայլին։
Եթե այս ճանապարհով չգնաք և չօգտագործեք այս խաղաքարտը, Ալիևը ձեզնից հերթական քաղաքական զիջումներն է կորզելու՝ օգտագործելով ռազմագերիների հարցը։ Դա էլ իր հերթին ազդելու է ձեր առանց այդ էլ անկման ուղին բռնած վարկանիշի վրա։
Իմ ընկերների մեջ կան և՛ ծպտյալ, և՛ բացահայտ նիկոլականներ։ Տղաներ ու աղջիկներ, իմ առաջարկը լոբբինգ արեք»։