«Քնում, զարթնում, իմ անունն է տալիս, ինձանով ռեյտինգ է ձեռք բերում»․ Վարդան Ղուկասյան

Գյումրու նախկին քաղաքապետ և քաղաքապետի թեկնածու Վարդան Ղուկասյանը ֆեյսբուքյան էջում տեսանյութ է հրապարակել՝ կից գրառմամբ․ «Վարչապետի խոսնակին խորհուրդ ենք տալիս զերծ մնալ ընտրապայքարը լարելու կամ ինչպես ինքն է ասում՝ թեժացնելու փորձերից, ինչպես նաև «հնացած», մերկապարանոց մեղադրանքներից և որակումներից, ինչքան էլ, որ մենք այս փուլում զրպարտանքի համար դատարան դիմելու ժամանակ չունենք։

Մենք հասկանում ենք, որ Ձեր միսիան Գյումրու խաղաղ ընտրական միջավայրը պոպուլիստական նախկին-ներկա, սրա արբանյակ, նրա արբանյակ, կրիմինալ կամ թալանչի կեղծ թեզերով կրկին թունավորելն է և ժողովրդին իբրև միակ «հրեշտակ» կամ «փրկիչ» ներկայանալը։ Դուք մի բան միայն չեք հաշվարկել . սա Գյումրին է, և այստեղ մարդիկ գործով են գնահատվում հիմար ճառերի փոխարեն։

Կրկին խորհուրդ կտայինք վարչապետի խոսնակի պաշտոնն օգտագործել հանուն հայրենի քաղաքի բարօրության, ոչ թե պառակտիչ և սին թեզերով այն թունավորելու։

Վարդան Ղուկասյանի գրասենյակ»։

«Մի հատ աղջիկ կա, Նազելի Բաղդասարյան է, ինչ է․ քնում, զարթնում, իմ անունն է տալիս և՛ Ազգային Ժողովում, և՛ այստեղ, ինձանով ռեյտինգ է միշտ ձեռք բերել։ Մի հատ էլ անեկդոտ կա․ ինչ հարց տալիս են, ինքը ոջիլի պատմությունն է անում։ Հիմա էս աղջիկը, երբ քնից զարթնի, բացի Վարդան Ղուկասյանից, ուրիշ բան չգիտի»,- տեսանյութում նշում է Ղուկասյանը։