«Հայոց աշխարհի կանայք ապրեցնող ուժ են»․ Տաթևիկ Հայրապետյան

Ադրբեջանագետ Տաթևիկ Հայրապետյանի ֆեյսբուքյան գրառումը․ «Ես իմ կյանքի տարբեր դրվագներում հանդիպել եմ բացառիկ կամային հատկանիշներով կանանց։ Բայց ասեմ, որ ամենից շատ ապշել ու հիացել եմ Արցախի հայ կանանց ապրելու ու ապրեցնելու ունակությամբ։ Տարիներ առաջ արտասահմանյան մի նկարահանող խմբի հետ Արցախում նյութ էինք պատրաստում ականազերծում իրականացնող կանանց մասին։ Նրանցից շատերը պարանները գոտկատեղին ամրացրած ականազերծում էին անում ամենաբարդ տեղանքներում։ Հիշում եմ նրանցից մեկի հետ առանձին զրույցի ժամանակ ասաց, որ միայնակ է մեծացնում իր զավակներին ու ոչ մի բանից չի բողոքում։ Մեկ այլ դրվագով տեսել եմ կանանց, ովքեր պատերազմում կորցրել են ընտանիքի բոլոր կամ գրեթե բոլոր տղամարդկանց, բայց այդքանով հանդերձ՝ Արցախից բացի՝ այլ տեղ ապրելու ու լինելու ոչ մի տարբերակ չէին դիտարկում։
Հողին ու արմատին ամուր կպած, ամենաանհավանական ծանր պայմաններում ապրող ու ապրեցնող են հայ կանայք, որոնք շատ հաճախ այնքան լուռ ու անձայն են բարդությունը հաղթահարում, որ անգամ շրջապատի մարդիկ դա չեն նկատում։ Հայոց աշխարհի փափկասուն կանայք բնավ էլ փափկասուն չեն, նրանք հայոց աշխարհի ապրեցնող ուժն են, նրանք հայոց աշխարհին կյանք ու շարունակություն տվողներն են։ Շնորհավոր կանանց միջազգային օրը»։