«Իշխանությունն ինքն է պահել նախկիններին քաղաքական դաշտում». Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը. «Իշխանական մի շարք կարկառուններ հերթով հայտարարում են, թե ովքեր են տարիներ շարունակ թալանել Գյումրին, կեղծել ընտրությունները, ճնշել ու ահաբեկել մարդկանց՝ ի պատասխան Սերժի թեկնածու Մարտուն Գրիգորյանի այն պնդման, թե հենց ՔՊ-ն է պատրաստվում ընտրակեղծիքների։
Մի պարզ հարց՝ եթե այս ամենը ձեզ վաղուց հայտնի էր, ապա ինչո՞ւ յոթ տարվա ընթացքում ոչինչ չեք արել։
Եթե դուք գիտեիք, եթե դուք համոզված էիք, եթե դուք հրապարակավ մատնանշում եք այդ մարդկանց, ապա ինչո՞ւ են նրանք այսօր կրկին ակտիվ քաղաքականության մեջ, ինչո՞ւ են նրանք թեկնածու, ինչո՞ւ են շարունակում վերահսկել ընտրական պրոցեսները։
Եթե դուք վստահաբար պնդում եք, որ Գյումրիի քաղաքական դաշտում տեղ չունեցող մարդիկ կրկին պայքարում են իշխանության համար, ապա դա միայն մեկ բան է նշանակում՝ իշխանությունը կամ չի կարողացել, կամ չի ցանկացել զրկել նրանց այդ հնարավորությունից։
Եթե դուք այսքան համոզված եք, որ Գյումրիի խնդիրների արմատը նախկիններն են, ապա ինչո՞ւ յոթ տարի շարունակ ոչ մի իրական քայլ չի արվել նրանց պատասխանատվության ենթարկելու համար, ինչո՞ւ դուք ձեր իսկ բարձրաձայնած մեղադրանքների հիմքով վարույթներ չեք նախաձեռնել։
Այս ամենն ունի մեկ բացատրություն. իշխանությունն ինքն է պահել նախկիններին քաղաքական դաշտում, որպեսզի կրկին ու կրկին ներկայացնի իր «մենք կամ նրանք» կեղծ ընտրությունը։
Եթե մարդիկ, որոնց դուք անվանում եք թալանչի, մարդասպան, ընտրակեղծարար, այսօր ազատորեն մասնակցում են ընտրություններին, ապա դա միայն ձեր անգործության հետևանքն է։
Մարդիկ ձեզնից արդարություն չեն խնդրում, նրանք պահանջում են պատասխան՝ ինչո՞ւ նրանք, ում դուք մեղադրում եք ամենածանր հանցագործությունների մեջ, շարունակում են մնալ քաղաքական դաշտում, ձեր թողտվությամբ, ձեր անգործությամբ, ձեր անպատասխանատվությամբ»։