Հայտնի է` ինչ են քննարկել Բայրամովն ու եվրոպացի պաշտոնյաները

Երեքշաբթի օրը՝ ապրիլի 1-ին, Ադրբեջանի ԱԳ նախարար Ջեյհուն Բայրամովը հանդիպել է Եվրոպական արտաքին գործողությունների ծառայության տնտեսական և գլոբալ հարցերով գլխավոր քարտուղարի տեղակալ Սայմոն Մորդուին և Հարավային Կովկասում և Վրաստանի ճգնաժամի հարցերով ԵՄ հատուկ ներկայացուցիչ Մագդալենա Գրոնոյին, հաղորդում է ԱՀ ԱԳՆ մամուլի ծառայությունը։

Հանդիպման ընթացքում քննարկվել են Ադրբեջանի և Եվրոմիության (ԵՄ) միջև համագործակցության ներկա վիճակը և հեռանկարները, ինչպես նաև երկկողմ հետաքրքրություն ներկայացնող տարածաշրջանային և միջազգային հարցեր։

Նշվել է, որ Ադրբեջանը և ԵՄ-ն սերտորեն համագործակցում են տնտեսության, առևտրի, էներգետիկ անվտանգության, կանաչ էներգետիկայի և այլ ոլորտներում, և քննարկվել են այդ ոլորտներում համագործակցության հարցեր։ «Մասնավորապես նշվել է, որ մեր երկրի նախաձեռնությամբ իրականացվող խոշոր ծրագրերը կարևոր դեր են խաղում Եվրոպայի էներգետիկ անվտանգության ապահովման գործում, և ընդգծվել է էներգիայի ավանդական աղբյուրների և այլընտրանքային էներգիայի ոլորտում համագործակցության շարունակականության կարևորությունը»,- ասվում է Ադրբեջանի ԱԳ հայտարարության մեջ։

Բայրամովը մանրամասն տեղեկություններ է հայտնել նաև հետհակամարտային շրջանում տարածաշրջանում առկա իրավիճակի և իրողությունների մասին՝ նշելով, որ իբրև թե «օկուպացիայից ազատագրված Ադրբեջանի» տարածքներում իրականացվում են լայնածավալ վերականգնման և շինարարական աշխատանքներ, ինչպես նաև մարդասիրական ականազերծում։

Բացի այդ, բարձրացվել են ականազերծման և անհայտ կորածների ճակատագիրը պարզելու ոլորտում Եվրոմիության հետ համագործակցության հարցեր։ Նշվել է, որ չնայած Ադրբեջանի և Հայաստանի միջև հարաբերությունների կարգավորման գործընթացում և խաղաղ գործընթացում ձեռք բերված հաջողություններին, Հայաստանի Սահմանադրության մեջ իբրև թե Ադրբեջանի նկատմամբ տարածքային պահանջների առկայությունը, ինչպես նաև «այդ երկրի արագ սպառազինումը» սպառնում են խաղաղության օրակարգի առաջխաղացմանը։