«Սահմանային գյուղերում ադրբեջանցիների թվաքանակը Հայաստանի համեմատ գերազանցում է տասն անգամից ավելի»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Բացում եք Հայաստան-Ադրբեջան google քարտեզը և հայ-վրաց-ադրբեջանանական եռանկյունուց «քայլում» դեպի հայ-ադրբեջանա-իրանական եռանկունի, ապա հայ-իրանա-նախիջևանյան եռանկյունուց՝ դեպի այն կետը, որտեղ Հայաստան-Իրան-Նախիջևան-Թուրքիա կետն է, մոտավորապես Երասխ բնակավայրը:
Հայ-ադրբեջանական սահմանը մոտ 1000 կիլոմետր է: Սահմանի հայկական հատվածի գյուղերի և ադրբեջանական գյուղերի բնակչության թվաքանակը բացահայտ Ադրբեջանի օգտին է:
Եթե Ադրբեջանում Հայաստանի համեմատ բնակչության քանակը գրեթե չորս անգամ է ավել՝ Ադրբեջանում՝ 10 միլիոն է, Հայաստանում՝ 3 միլիոն, ապա սահմանային հատվածում ադրբեջանցիների թվաքանակը գերազանցում է տասն անգամից ավելի: Շուտով Ադրբեջանը կվերաբնակեցնի նաև Սյունիքի հատվածում սահմանային Քելբաջարի, Լաչինի, Ղուբաթլուի ու Զանգելանի շրջանների գյուղերը:
Իսկ մենք ի՞նչ ենք անում և ի՞նչ ենք արել:
Դատարկ խոսել ենք և սահմանային գյուղերից հավաքվել Երևանում, խոսել Մեծ Հայաստանից, դեռ մի կողմ եմ թողնում Հայաստանից արտագաղթը արտերկիր:
Հիմա՝ պետության համար դժվար է՞ Կապանի Ճակատեն-Ներքին Հանդ հատվածի 5 գյուղերից յուրաքանչյուրում կառուցել 50-ական տուն կամ այդ դատարկված գյուղերում գնել 50-ական տուն և դրանք անվարձահատույց առաջարկել գյուղացի, աշխատավոր այն արցախցիներին, ովքեր ուզում են տուն ունենալ, զբաղվել անասնապահությամբ, գյուղատնտեսությաւմբ, մեղվաբուծությամբ և ովքեր ուզում են ՀՀ քաղաքացիություն ընդունել ու չհեռանալ Հայաստանից:
Այս հինգ գյուղերի բոլոր դպրոցներում միասին 50 աշակերտ չկա:
Խոսքը այն արցախցիներին օգնելու մասին չէ, ովքեր Երևանում են ուզում տուն ունենալ, խոսքը այն արցախցիների մասին է, ովքեր կցանկանային ապրել գյուղական շրջաններում:
Եթե պետությունը, այն է՝ օրվա իշխանությունը սա չի անում, ապա՝
ա/ անտարբեր է հայ ժողովրդի մի հատվածի ճակատագրի նկատմամբ,
բ/ խթանում է նրանց արտագաղթը Հայաստանից,
գ/ չի մտահոգվում Հայաստանի ժողովրդագրական վիճակով:
Հիշում եք, չէ՞, 2019-ի օգոստոսին «Արցախը Հայաստան է և վերջ» ասելու հետ Հայաստանի բնակչության թիվը հինգ միլիոնի էր հասցնում»: