«Զինվորականները «կուլ» են տալիս իշխանության հերթական կշտամբանքը»․ Տիգրան Աբրահամյան

ԱԺ «Պատիվ ունեմ» խմբակցության պատգամավոր Տիգրան Աբրահամյանի ֆեյսբուքյան գրառումը․ «Իշխանության պատկերացմամբ, մինչև 2021-22 թթ.-ը Վազգեն Սարգսյանի անվան ռազմական ակադեմիան եղել է «գաղութի և զորամասի արանքի մի հաստատություն», որտեղ տարի է եղել, որ 16 կուրսանտ է ընդունվել:
Այս մասին ԱԺ-ում իշխանական պատգամավորն էր հնչեցնում, ով ի դեպ, ԱԺ պաշտպանության և անվտանգության հանձնաժողովի անդամ է:
Մի կողմ դնենք այն հանգամանքը, որ չի «հիշվում» այն տարիները, երբ 1000-ից ավելի դիմորդ էր լինում, կուրսեր, որտեղ 500-ից ավելի կուրսանտներ էին սովորում, փաստացի կոնկրետ որակումներ է հնչեցվում, ռազմաուսումնական հաստատությունում վերջին տասնամյակում կրթված հազարավոր անձանց, որոնցից շատերը նահատակվել են Հայաստանի ու Արցախի անկախության և անվտանգության համար մարտերում:
Ասելիքը շատ է, բայց այստեղ խնդիրն առաջին հերթին այն զինվորականների դիրքորոշումներում է, ովքեր տարիներ շարունակ ռազմակրթական գործունեություն են ապահովել, շատերն այսօր էլ տարբեր բնույթի, այդ թվում՝ բարձրագույն օղակներում, պաշտոններ են զբաղցնում, անցել են այս բուհ-ով և «կուլ» են տալիս քաղաքական իշխանության հերթական կշտամբանքը:
Ռազմական ուսումնական հաստատությունները 1-2 տարում չեն հիմնադրվում և առավել ևս՝ կայանում, դրանք զարգացման և բարելավման փուլեր են անցնում, արձանագրելով և՛ հաջողություններ, և՛ բացթողումներ, սակայն համեմատություններն ու որակումները բացառապես մեկ նպատակ ունեն՝ արդարացնել սեփական տապալումներն ու պարտությունների շղթան, պատասխանատվությունը քաղաքական վերնախավից տեղափոխելով զինվորականների տիրույթ:
Հ․Գ. Մեծ առումով եկել են ասելու, որ տեսանելի ապագայում մեզանից անվտանգություն չակնկալեք, «ստիպված» զիջելու ենք»: