«Սա աններելի հանցանք է հայության դեմ»․ Հայկ Խանումյան

Արցախի ՏԿԵ նախկին նախարար Հայկ Խանումյանի ֆեյսբուքյան գրառումը․ «Թվերը կարևոր են։ Հատկապես մեր օրերում։
Արցախյան առաջին պատերազմի ժամանակ արցախյան ճակատում զոհվել է 6157 զինծառայող, նրանցից 3200 Արցախից են եղել, բացի դրանից ևս 1000 քաղաքացիական անձ է զոհվել։ Առաջին պատերազմի ժամանակ արցախյան ճակատից դուրս, այլ վայրերում (Երասխից մինչև Իջևան, Կապան) զոհվել է ևս 1000 զինծառայող։ Արցախյան առաջին պատերազմի ժամանակ100 հազար բնակչի հաշվով Արցախը տվել է 2134 մարտական զոհ, Հայաստանը՝ 132 մարտական զոհ։ 2020թ․ պատերազմին զոհվել է մոտ 4000 զինծառայող, որից 800-ը՝ Արցախի բնակիչ։ Արցախում 100 հազար բնակչի հաշվով զոհվել է 533 զինծառայող, Հայաստանից՝ 107 զինծառայող։ Մեր զինվորները չեն նահատակվել Արցախի կամ Հայաստանի համար առանձին-առանձին՝ նրանք զոհվել են Հայրենիքը պաշտպանելիս, և էական չէ, այդ ժամանակ որտեղով էր անցնում Հայրենիքի սահմանները։ Մարդիկ զոհվել են հանուն հայության, որպեսզի հայության մնացած մասը կարողանա ուժեղ պետություն ու հասարակություն կառուցի՝ հիմնված հանդուրժողականության վրա։ Այս մարդկանց կյանքի շնորհիվ է, որ ոմանք, կարողացան օգտագործել 80-ականների վերջի և 90-ականների սկզբի հնարավորությունները և մեծ կարողություններ կուտակեցին։ Այսօր նրանցից մեկը՝ Խաչատուր Սուքիասյանն ակնհայտորեն ու արդեն վստահ եմ, միտումնաբար, զբաղված է ներազգային թշնամանք սերմանելով՝ նսեմացնելով հայության կորուստներն ու զրկանքները։ Սա աններելի հանցանք է հայության դեմ։ Ցուցակագրենք այս անունները և սպասենք լավ օրերի, երբ ներազգային թշնամանք տարածողները համարժեք պատասխան կտան»։