«Արարատ Միրզոյանի ասածից հետևում է, որ Հայաստանն Ադրբեջանին ՀՀ քաղաքացիներից գերադասում է»․ «ՀայաՔվե»

«ՀայաՔվե»-ի թելեգրամյան գրառումը․ «Անթալիայի դիվանագիտական ֆորումը, որին մեծ պատրաստակամությամբ մասնակցում է այս վարչախումբը, միջազգային ձևաչափ չէ, այն ամեն տարի կազմակերպում է Թուրքիայի ԱԳՆ-ն և հյուրընկալում Թուրքիայի բարեկամ, դաշնակից, գործընկեր պետությունների դիվանագիտական կորպուսների ղեկավարների։

Հայաստանն Անթալիայի դիվանագիտական ֆորումին մասնակցում է արդեն 3-րդ անգամ, մեկ անգամ էլ փորձեց մասնակցել 2023թ․ սկզբին, այն ժամանակ Թուրքիային պատուհասել էր երկրաշարժը, և մեզ չհրավիրեցին, բայց այս վարչախումբը մասնակցելու պատրաստակամություն հայտնել էր։

Անթալիա մեկնած ԱԳ նախարար Միրզոյանի ասածից հետևում է, որ Հայաստանն Ադրբեջանին սեփական քաղաքացիներից գերադասում է, որովհետև ՀՀ որևէ քաղաքացի չի կարող հատել սահմանն առանց բեռները հայտարարագրելու, իսկ ահա թշնամի պետությանը նման առաջարկ է արվում։ Բացի դրանից՝ Ադրբեջանի կողմից հայելային սկզբունքով նման պատրաստակամություն չկա»։