«Նիկոլ Փաշինյանին հեռացնելու պահը հասունացել է». Սերժ Սարգսյան

ՀՀ երրորդ նախագահ, ՀՀԿ նախագահ Սերժ Սարգսյանը թոռնիկների հետ այցելել է Ծիծեռնակաբերդի հուշահամալիր՝ հարգանքի տուրք մատուցելու Մեծ եղեռնի զոհերի հիշատակին։ Նա պատասխանեց լրագրողների մի քանի հարցերին։
«Իշխանությունները Ցեղասպանության ուրացման ճանապարհին են։ Որ ասեմ 100%-ով ուրացել են, ոչ, այսօր էլ են եկել այստեղ»,- ասաց նախագահը։ «Ինչ էլ դրանք ասեն, միևնույն է մեր ժողովրդի 80%-ն ասելու է, որ դավաճան են»,-շարունակեց նա։

Հարցին՝ այն, որ դավաճան են, կարտացոլվի՞ 2026-ի ընտրություններում, Ս. Սարգսյանն ասաց. «Կարծում եմ կարտացոլվի նաև մինչև 2026 թվականը»։

Լրագրողի հարցին՝ փողոցային պայքար է սպասվո՞ւմ, ՀՀ երրորդ նախագահը պատասխանեց. «Այո»։
«Ես շատ երկար եմ ծառայել ՀՀ-ին՝ 25 տարուց ավել, ինչով էլ գուցե պայմանավորված է, որ ես այս երկրի ամենազրպարտված պաշտոնյաներից մեկն եմ»,- ասաց Սարգսյանը՝ անդրադառնալով Նիկոլ Փաշինյանին իշխանության բերելու մեղադրանքներին։
Հարցին՝ ո՞վ համբուրեց էշին, Սարգսյանը պատասխանեց․ «Էշին համբուրողները շատ էին․ մեկ հոգի չի եղել»։
Սերժ Սարգսյանի խոսքով իշխանությունները չեն կարող Սահմանադրություն փոխել, հրաժարվել Անկախության հռչակագրից, քանի որ «չեն հասցնի»։
Անդրադառնալով Նիկոլ Փաշինյանին հեռացնելուն ուղղված փողոցային շարժումներին՝ նախագահն ասաց, որ «պահը հասունացել է»։ Հարցին, թե պատրա՞ստ է նորից առաջնորդել երկիրը՝ նախագահը պատասխանեց՝ «Ոչ»։