«Հայհոյել եմ, լավ եմ արել, Արթուր Չախոյանին խորհուրդ կտամ իրա տան խրախճանքները զապիս անի ու հանրայնացնի»․ Տիգրան Տեր-Մարգարյան

Նոր Նորք վարչական շրջանի ղեկավար Տիգրան Տեր-Մարգարյանը, «Սիվիկ» լրատվականի հետ զրույցում մեկնաբանելով այսօր թաղապետարանում տեղի ունեղած բողոքի ակցիան, նշել է. «Արթուր Չախոյանի և Մեսրոպ Մանուկյանի քաղաքական տերերը չեն մարսել իմ՝ Բուչա գնալը»։

Տեր-Մարգարյանը չի ժխտել, որ հայհոյել է հեռախոսով։ «Այո՛, ես հայհոյել եմ հեռախոսով, չեմ հրաժարվում, վերահաստատում եմ հայհոյանքս, որովհետև Մեսրոպ Մանուկյանը և պարոն Չախոյանը գնացել են մի մանկապարտեզ, որը դեռ հանձնված չէ, կան բազմաթիվ խնդիրներ, քաղաքապետարանը չի ընդունել, այսինքն, ակտը ստորագրված չէ, գումարը փոխանցված չէ, շինարարներն ունեն խնդիր, այդ խնդիրը պետք է լուծեն, որից հետո կլինի մանկապարտեզի բացում․․․ Մանիպուլյացիա են անում՝ ցույց տալով, իբր, այնտեղ երեխաներ են մնում, և որ քարերը կթափվեն երեխաների գլխին․․․ Մեսրոպ Մանուկյանին ասում եմ՝ այդ քարը նվեր կտամ, շարի քաղաքական թիմիդ, հատ-հատ խփի քաղաքական անդամներիդ, վերջում էլ ղեկավարիդ գլխին։ Որևիցե անբարոյական իրավունք չունի գնա մանկապարտեզ ու քննարկի իմ կամ իմ ընկերների բարոյական արժեքները»,- ասաց նա՝ հավելելով՝ Մեսրոպ Մանուկյանը հրաժարվել է ինձ հետ հանդիպումից, հայհոյել եմ, լավ եմ արել։ Եկել են քաղաքապետարան կռիվ են տալիս իմ նկարի հետ, մածուն են լցրել իմ նկարի վրա։

Տեր-Մարգարյանի խոսքով՝ այս ամենի նպատակը շոու սարքելն է․ «Իրենց պատվերները գալիս են այն երկրից, որի քաղաքացին է Արթուր Չախոյանը։ Իրենք չեն մարսել Բուչան ու իմ քաղաքական կողմնորոշվածությունը»։

«Արթուր Չախոյանին խորհուրդ կտամ իր տան խրախճանքները զապիս անի ու հանրայնացնի։ Այս ամենին լինելու է և՛ քաղաքական, և՛ ոչ քաղաքական պատասխան»,- ընդգծեց Տեր-Մարգարյանը։