Անկախներն իմպիչմենթին դեմ են. «Հրապարակ»

«Հրապարակ»-ը գրում է. «Էդգար Ղազարյանն ու Նարեկ Մալյանը նախօրեին խորհրդարանի 107 պատգամավորներին իմպիչմենտի գործընթաց նախաձեռնելու նամակներ են փոխանցել՝ դրան կից որոշման նախագիծ, որում բացակայում է միայն վարչապետի թեկնածուի անունը: Սակայն նախագիծը շրջանառության մեջ դնելու համար ԱԺ 36 պատգամավորի ստորագրություն է պետք, մինչդեռ 2 ընդդիմադիր խմբակցությունները միասին ունեն 34 ձայն։
Խորհրդարանը նաև 4 անկախ պատգամավոր ունի, որոնք որևէ խմբակցության անդամ չեն՝ Իշխան Զաքարյանը՝ «Պատիվ ունեմ»-ից դուրս եկած, Գեղամ Նազարյանը՝ «Հայաստան» դաշինքից, և ՔՊ-ից վտարված Հովիկ Աղազարյանն ու Հակոբ Ասլանյանը, որոնք նոր կուսակցություն են ձևավորել, հիմնադիր համագումար արել և սպասում են, որ կուսակցությունը գրանցվի։ Երեկ Աղազարյանը մեր լրագրողին ասել է, որ իրենք չեն միանալու իմպիչմենտի նախաձեռնությանը, թեպետ նախկին հարցազրույցներում և համագումարի ելույթում հայտարարել էր, թե ամեն ինչ պետք է անեն, որ Փաշինյանն այլեւս վարչապետ չընտրվի:

Աղազարյանն ասում է՝ իմպիչմենտին միանալով՝ դեմ կգնանք մեր նորաստեղծ կուսակցության հռչակած սկզբունքներին։ «Ես լավ չեմ էլ պատկերացնում, թե այդ նախաձեռնությանը միանալն ինչ է նշանակում, որքանով լսել եմ Նարեկ Մալյանին, Էդգար Ղազարյանին, նախաձեռնությունը կայանում է նրանում, որ պատգամավորներն իրենք վարչապետի թեկնածու առաջադրեն կամ աջակցեն մյուսների կողմից առաջադրված թեկնածուին։ Այս կոնտեքստում մեր նորաստեղծ կուսակցության մոտեցումներում փոփոխություն չկա, մենք չենք միանում Սերժ Սարգսյանի և Ռոբերտ Քոչարյանի առանցքի շուրջ հավաքված ուժերին»,- ասաց Աղազարյանը»: