«Թող չմտածեն՝ եթե մարդը հիասթափվել է Նիկոլ Փաշինյանից, ուրեմն փոշմանել է, որ նախկիններին մերժել է»․ Էդմոն Մարուքյան

«Հեղափոխության ժամանակ 2 բան է տեղի ունեցել՝ առաջին՝ մերժվել է Սերժ Սարգսյանի իշխանությունը, ինչպես նաև մերժվել են 20 տարի երկրում տիրող այլանդակությունները, և երկրորդ՝ քանի որ հեղափոխությունն առաջնորդում էր Նիկոլ Փաշինյանը, նա ընտրվել է վարչապետ։

Փորձում են տպավորություն ստեղծել, թե մարդիկ փոշմանել են, որ Սերժ Սարգսյանին մերժել են, բայց չկա նման բան, ոչ ոք չի փոշմանել»,- այս մասին «ԱրմԼուր»-ի հետ զույցում նշել է Էդմոն Մարուքյանը։

Նա նաև ընդգծել է, որ այժմ հարյուր հազարավոր մարդիկ փոշմանել են, որ Նիկոլ Փաշինյանն է ընտրվել, որոհետև այն հույսերը, որոնք ունեցել են, մսխվել են։

«Էլեկտորալ տարի է գալիս, հույս ունեմ՝ ժողովուրդը կշտկի այդ սխալը։ Բայց խոսքը նախկինի վերադարձի մասին չէ, նախկինին վերադարձ չի լինելու, թող հույս չունենան, չմտածեն, որ եթե մարդը հրաժարվել է Նիկոլ Փաշինյանից կամ հիասթափվել է իշխանությունից, ուրեմն նաև փոշմանել է, որ մերժել է նախկին ռեժիմին։ Ոչ ոք չի փոշմանել, որ նախկին ռեժիմը մերժվել է»,- հավելեց Մարուքյանը։