«Ամոթը ոչ թե հարևան երկրի հետ հարաբերություններ կարգավորելն է, այլ դրանք անտեսելը»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Վերջին շրջանում, ի պատասխան իշխանությունների հասցեին քննադատությունների, որ նրանք համագործակցում են թուրքի հետ, կատարում թուրքի պահանջը, անգամ, որ իբր թուրք են, իշխանական շրջանակները, իրենց հերթին, գնում են մեր պատմության 100-ամյա անցյալ և հիշեցնում, որ ժամանակին ՀՅԴ-ն է համագործակցել Երիտթուրքերի, Էնվերի, Թալեաթի, մյուս ոճրագործների հետ, ովքեր իրականացրեցին Հայոց ցեղասպանությունը:
Երկու դեպքում էլ, երբ ընդդիմությունը մեղադրում է իշխանություններին, իսկ իշխանությունը՝ ՀՅԴ-ին, առկա է քաղաքական և հատկապես քարոզչական մոտեցում:
Ես, որպես հայ-թուրք հարաբերությունների հետազոտող, շատ կուզենայի, որ մեր հանրությունը տեղեկություններ ունենար երկու հարևան պետությունների մասին:
Ո՛չ Իթթիհատի հետ շփումներն են խարան, ո՛չ Հայաստանի Հանրապետության շրջանում Օսմանյան կայսրության հետ դիվանագիտական հարաբերությունները, և ո՛չ էլ՝ այսօրվա Թուրքիայի հետ հարաբերությունները կարգավորելու փորձերը:
Թուրքը, Թուրքիան, մեր հարևանն են:
Հայը և Հայաստանը թուրքի հետ ունեն ընդհանուր սահման:
Ամոթը ոչ թե հարևանի հետ հարաբերություններ կարգավորելն է, այլ դրանք անտեսելն ու մեր համազգային վիշտը՝ Հայոց ցեղասպանությունը օտար խորհրդարաններում վաճառքի հանելն ու դրա վրա ինդուստրիա կառուցելը, եթե կուզեք՝ փող աշխատելը:
Շատ լավ կլինի, եթե մեր պատմաբանները, նաև՝ ՀՅԴ-ական ու սոցիալ-դեմոկրատ պատմաբանները, մանրամասն մեր հանրությանը ներկայացնեն ՀՅԴ-Իթթիհատ, ՍԴՀԿ-Իթթիհատ շփումների և համագործակցության պատմությունը:
Դա կուսակցական պատմություն չէ, դա մեր՝ հայ ժողովրդի պատմությունն է և մենք իրավունք ունենք տեղյակ լինելու մեր պատմությանը»: