«Դատավորի դեր չեմ ստանձնելու»․ Տիգրան Ավինյան

«Բռնության որևէ ձև, լինի դա ֆիզիկական, խոսքով, թե սադրանքով, մեզ համար անընդունելի է։ Երևանի քաղաքապետարանի յուրաքանչյուր աշխատակից և մասնավորապես վարչական շրջանի ղեկավարները, ովքեր քաղաքապետի ներկայացուցիչներն են, պարտավոր են ցուցաբերել զսպվածություն կյանքի բոլոր պարագաներում, չտրվել սադրանքների»,- գործակարգավարական խորհրդակցության ժամանակ ասաց Երևանի քաղաքապետ Տիգրան Ավինյանը՝ անդրադառնալով Նոր Նորքի թաղապետարանում տեղի ունեցած միջադեպին։ Ավինյանի խոսքով չի պատրաստվում դատավորի դեր ստանձնել, քանի որ կա քրեական գործ․ «Կա նաև երկրորդ կողմ, այնուամենայնիվ, կան խուլիգանության հոդվածով անձինք»,- ասաց Ավինյանը՝ խոսքը փոխանցելով Նոր Նորք վարչական ղեկավար Տիգրան Տեր-Մարգարյանին։ Վերջինս իր խոսքոմ նշեց, որ ցավում է տեղի ունեցածի համար, պարտավոր էր զսպվածություն դրսևորեր և ներողություն խնդրեց քաղաքապետից ու հանրությունից։ Ավինյանը, գնահատելով Տեր-Մարգարյանի խոսքը, շարունակեց․ «Տեխնոլոգիաների դարում, տիկտոկյան հիթ դառնալու նպատակով շատերը փորձելու են նմանատիպ սադրանքներ իրականացնել, սա չի նշանակում, որ մեր որևէ մկան, բիլակները նկատի չունեմ, ունքը չպետք է ավել շարժվի։ Մեր որևէ արձագանք չի կարող չլինել զսպված»,- ասաց Ավինյանը: