«Կարկուտի վնասների փոխհատուցման ի՞նչ քայլեր են ձեռնարկվում»․ Գառնիկ Դանիելյանը՝ Գևորգ Պապոյանին

«Երեկ ուժեղ կարկուտի պատճառով Արարատյան դաշտավայրի բազմաթիվ ֆերմերներ խոշոր վնասներ են կրել, ի՞նչ քայլեր են ձեռնարկվում փոխհատուցման համար։ Նրանցից շատերը վարկային պարտավորություններ ունեն»,- ԱԺ-ում Էկոնոմիկայի նախարար Գևորգ Պապոյանին հարց ուղղեց ընդդիմադիր պատգամավոր Գառնիկ Դանիելյանը։ Նա նաև հայտնեց, որ ահազանգեր կան, թե հակակարկտային կայանները շատ տեղերում առկա չեն կամ պատշաճ չեն աշխատում։
Գևորգ Պապոյանը պատասխանեց, որ նրանք, ովքեր ապահովագրել են իրենց այգիները, խնդիր չեն ունենա, վնասը կփոխհատուցվի․ «Վնասները կգնահատենք, կհասկանանք չափերը։ Մեր հնարավորությունների սահմանում կփորձենք աջակցել»,- ասաց Պապոյանը։ Նա հորդորեց ապահովագրել այգիները և մասնակցել կանխարգելիչ ծրագրերին։ Պապոյանի խոսքով հակակարկտային ցանցերի տեղադրման ծրագիր է իրականացվում, որի ծախսի 75%-ը պետությունը սուբսիդավորում է․ «Այ եթե դրա մասին շատ խոսենք, մի քանի քաղաքացիներ հակակարկտային ցանը քաշած լինեին, խնդիր չէին ունենա»,- ասաց Պապոյանը։ Նա նաև հայտնեց, որ հակակարկտային կայանները ամբողջ ծավալով ամբողջ գիշեր աշխատել են, թեպետ դրանք 100 տոկոսանոց արդյունավետություն չեն կարող ապահովել։