«Թող չափերն իմանան, կեղծ օրակարգով մոլորեցնող ՔՊ-ն հերիք է»․ Աղվան Վարդանյան

«Էդգար Ղազարյանը հանդիպել է 2-րդ, 3-րդ նախագահներին, Բագրատ Սրբազանին։ Մամուլում հրապարակում եղավ, Էդգարին հղումով, որ միայն 2-րդ նախագահը չի ողջունել հենց այսօր իմպիչմենթ սկսելու գաղափարը։ Հաշվեք՝ ես գիտեմ-չգիտեմ նախագահների հետ զրույցների բովանդակությունը։ 3-րդ նախագահը ողջունե՞լ է հենց այսօր իմպիչմենթ սկսելու ծրագիրը։ Թող Էդգարը ասի, եթե ասաց՝ ողջունել է, ես կառաջարկեմ «Պատիվ ունեմ» խմբակցությանը սկսել, թեկնածուի անունը տալ»,- հրապարակային պատասխանելով իմպիչմենթի գործընթաց սկսելու մասին իրեն ուղղված նամակին՝ ասաց ԱԺ ընդդիմադիր պատգամավոր Աղվան Վարդանյանը։ «Ասում են՝ թող «Հայաստան»-ն առաջարկի Ռոբերտ Քոչարյանի թեկնածությունը, «Պատիվ ունեմ»-ն Արթուր Վանեցյանի։ Արթուր Վանեցյանն ի՞նչ կապ ունի «Պատիվ ունեմ»-ի հետ։
Իմ համոզմամբ, «Հայաստան» խմբակցության առաջնորդը 2-րդ նախագահն է, «Պատիվ ունեմ»-ինը՝ 3-րդ նախագահը»,- ասաց Աղվան Վարդանյանը՝ շարունակելով․ «Էդգար Ղազարյանին գնահատում եմ, աշխատասեր է, հումորով, համառ է, հիանալի նմանակումներ է անում։ Բայց չափազանց շատ է խոսում, ինչը լավ հատկություն չէ, համառ սևեռումներ ունի, ինչը ևս լավ տեղ չի տանում։ Բայց երբեմն լկտիանում ու փորձում է մեզ շանտաժի ենթարկել։
Ես չգիտեմ՝ Էդգարը կուսակցության անդամ է, թե ոչ։ Հիշեցնեմ Էդգարին՝ ես միշտ օգնական եմ ունեցել։ Հաստատում եմ՝ ինքն էլ լավ օգնական էր։ Նարեկ Մալյանին միայն հիշեցնեմ, որ իմ՝ իրեն այդքան ոգևորած 2018-ի ելույթում նաև ասել եմ՝ ես կուռքեր չեմ ընդունում։ Եվ հետո՝ Էդգա՞րն ու Նարե՞կն են ինձ պարտադրելու այսօր անել մի բան, ինչին ես չեմ հավատում։ Ո՞ւմ են պարտադրելու։ «Ես կճնշեմ այդ պատգամավորին»,- ասում է Նարեկը։ Դե արի, ինձ ճնշիր։ Նարեկը հաճախ նաև լկտիանում է։ Ասում է՝ 2021-ին խաբել են ավանտյուրիստի նման, քվե էին կլյանչիտ անում, ընդդիմադիր աֆերիստներ, անբարոյական կեցվածք ունեն։ Սիրով ասում եմ՝ լկտիությամբ նրա հետ կարող են մրցել միայն ՔՊ-ական մի քանի պատգամավորներ։
Թող ձյուն չգա Նարեկ Մալյանի, Էդգար Ղազարյանի գլխին, թող կանաչ արև ունենան։ Բայց թող չափերն իմանան։ Կեղծ օրակարգով հասարակությանը մոլորեցնող ՔՊ-ն հերիք է։
Վերջերս ՀՀ 3-րդ նախագահը ասաց, որ իշխանափոխության ծրագիր ունեն մինչև 2026 թվականը։ ՀՀԿ-ն հայտարարել է, որ ոչ մի ընդդիմադիր ուժ միայնակ իշխանափոխություն չի կարող անել։ Ուրեմն այդ ծրագիրը կներկայացվի՝ կտեսնենք։ Վստահ եմ՝ այդ ծրագիրը հենց այսօր իմպիչմենթ սկսելը չէ։
Ինձ համար այս թեման այլևս փակ է։ Որովհետև «Հայաստան» դաշինքի և 2-րդ նախագահի դեմ կազմակերպված այս արշավը բարոյական չէ։ Իսկ ինչը բարոյական չէ, արդյունավետ չի լինելու»,- ասաց Վարդանյանը։