«Վահե Ղալումյանին հարց ունեի․ ե՞րբ է մասնակցել ՀՀ-ի և Արցախի ԱԺ-ների հանձնաժողովի նիստին»․ Էդգար Ղազարյան

Ինչպես հայտնել էինք, հասարակական, քաղաքական գործիչ Էդգար Ղազարյանն այցելել էր ԱԺ՝ քաղաքացիների ընդունելության շրջանակներում հանդիպելու Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողով անդամների հետ։ Նա պատրաստվում էր քննարկել Նիկոլ Փաշինյանին անվստահություն հայտնելու վերաբերյալ հարցը։
Ղազարյանի ընդունելությանը հանձնաժողովից ներկա էր միայն «Հայաստան» խմբակցության պատգամավոր Արման Ղազարյանը։
«Ցավոք, այլ պատգամավորներ չկային, թեպետ ընդունելությունը նախատեսված էր հանձնաժողովի հետ։ Ես հարցեր ունեի հանձնաժողովի նախագահ Վահե Ղալումյանին, ով ընդգրկված է ՀՀ-ի և Արցախի ԱԺ-ների համագործակցության միջխորհրդարանական հանձնաժողովի կազմում։ Ինձ հետաքրքիր էր՝ պարոն Ղալումյանը վերջին անգամ ե՞րբ է մասնակցել այդ հանձնաժողովի նիստին, ի՞նչ հարցեր են քննարկվել, ո՞րն է եղել օրակարգը, նա փող է ստանում նաև այդ հանձնաժողովում աշխատելու համար»,- ասաց Ղազարյանը՝ հավելելով, որ իշխանական պատգամավորները ոչ թե վախեցել, այլ ուղղակի խուսափել են իր հետ շփումից, հարցադրումներից։