«Հայտարարություն՝ բանկային զեղծարարությունների ու ԿԲ-ի անպատասխանատվության մասին»․ Մհեր Կարագոզյան

«Հանրային վերահսկողություն» ՀԿ նախագահ Մհեր Կարագոզյանի ֆեյսբուքյան գրառումը․ «ԲԱՆԿԱՅԻՆ ԶԵՂԾԱՐԱՐՈՒԹՅՈւՆՆԵՐԻ ԵՎ ԿԵՆՏՐՈՆԱԿԱՆ ԲԱՆԿԻ ԱՆՊԱՏԱՍԽԱՆԱՏՎՈւԹՅԱՆ ՄԱՍԻՆ՝ ՀԱՆՐԱՅԻՆ ՀԱՅՏԱՐԱՐՈՒԹՅՈՒՆ
Վերջին տարիներին աճել են բողոքները քաղաքացիներից, ովքեր դարձել են բանկային համակարգում տեղի ունեցող ֆինանսական զեղծարարությունների զոհ։ Չնայած այդ զեղծարարությունները տեղի են ունենում կիբեռհանցագործությունների քողի տակ, ըստ մեր դիտարկումների՝ անհնար է բացառել բանկերի ներգրավվածությունն ուղղակիորեն կամ անուղղակի՝ աշխատանքային թերացումների, անզգուշության կամ դիտավորյալ անգործության միջոցով։
Սա այլևս միայն հանցագործության հարց չէ՝ սա համակարգային անարդարության վկայությունն է։
Բանկերը հաճախ շտապում են մեղադրելու հենց քաղաքացուն՝ ասելով, որ իբր ինքն է փոխանցել անձնական տվյալները 3-րդ անձին։ Այս վարկածը տարածվում է որպես ընդհանուր արդարացում, առանց խորքային քննության։ Սակայն կան դեպքեր, երբ քաղաքացին նման տվյալներ չի տրամադրել, իսկ բանկի աշխատակիցների անփույթ կամ ուշացած արձագանքը հանգեցրել է նրա գումարների գողությանը։
Այս ամենին ավելանում է Կենտրոնական բանկի նախագահի մոլորեցնող հրապարակային վարքագիծը։ Նա հայտարարում է, որ իբր զեղծարարության զոհ դարձած քաղաքացիների վարկային պահանջները սառեցվել են, մինչդեռ մեր փաստահավաք աշխատանքները ցույց են տալիս՝ դա չի համապատասխանում իրականությանը։ Զոհերն ամեն օր բախվում են վճարողական խնդիրների, վարկային ճնշման և պարտավորությունների կատարման պահանջներին։
Մենք փաստում ենք.
▫️Բանկերը հաճախ անտեսում են իրենց գործառույթների մեջ եղած խախտումները,
▫️ԿԲ-ն հրաժարվում է գործնական վերահսկողությունից և պատասխանատվությունից,
▫️Զոհ դարձած քաղաքացիները դուրս են մնում իրավական պաշտպանության ոլորտից։
Մեր պահանջներն են.
1. Անկախ քննություն՝ բոլոր դեպքերի վերաբերյալ, որտեղ առկա է բանկի հնարավոր մեղավորություն կամ թերացում,
2. ԿԲ նախագահի հրաժարական՝ հանրությանը մոլորեցնող հայտարարությունների և անգործության հիման վրա,
3. Իրական աջակցություն՝ զեղծարարության զոհ դարձած քաղաքացիներին՝ վարկերի սառեցում, վնասի փոխհատուցում և իրավական աջակցություն։
Երբ բանկերը գործակցում են լռությամբ կամ անգործությամբ, իսկ ԿԲ-ն արդարացնում է նրանց, հասարակությունը դառնում է անպաշտպան։
Մենք չենք լռելու։ Մենք պահանջում ենք արդարություն»։