«ԱԺ-ում ինձ հետ չեն ուզում հանդիպել․ դա խտրականություն է, ինչը քրեորեն պատժելի է»․ Էդգար Ղազարյան

Քաղաքական-հասարակական գործիչ Էդգար Ղազարյանն այսօր «168-ի» հետ զրույցում նշեց, որ շարունակելու է գնալ ԱԺ՝ քաղաքացիների ընդունելության, նույնիսկ, եթե ՔՊ-ականները հրաժարվում են իրեն ընդունել, ավելին՝ իրավական ընթացք է տալու բոլոր այդ դեպքերով։

«ԱԺ աշխատակցուհին տեղեկացնում է, որ ԱԺ փոխնախագահները և պատգամավորները ինձ հետ չեն ուզում հանդիպել։ Ակնհայտ է, որ ընդունարանում գտնվող այլ քաղաքացիներին հրավիրում են ընդունելության, միայն ինձ չեն հրավիրում: Խտրականությունը քրեորեն պատժելի է, երբ մարդկանց նկատմամբ խտրական վերաբերմունք է ցուցաբերվում, այդ թվում՝ քաղաքական կամ այլ հայացքների, այլակարծության համար, և ավելի խստացնող նորմ ունի, եթե դա դրսևորվում է պետական պաշտոնյաների կողմից իրենց պարտականությունների կատարման ժամանակ։ Ես արդեն հանցագործության մասին 3 հաղորդում ներկայացրել եմ Գլխավոր դատախազին, վաղը կներկայացնեմ նոր հաղորդում»,- նշեց Ղազարյանը՝ հավելելով, որ հետևողական է լինելու և ներպետական ատյաններից հետո մինչև ՄԻԵԴ պատրաստվում է դիմել: