«Մինչև չազատվենք «ՌԴ-ն մեր փրկիչն է» մտածողությունից, չենք գտնելու մեր տեղն այս տարածաշրջանում». Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Հայ-ռուսական, ավելի ճիշտ՝ Հայաստան-Ռուսաստան հակասությունների աղբյուրը մեր գլխուղեղում է նախ և առաջ:
Տասնամյակների ընթացքում, եթե կուզեք՝ 1827-ից ի վեր, հայ հավաքական միտքը, հայ գրականությունը և պատմագրությունը ձևավորել են մի համոզում, որ հայ ժողովրդի փրկությունը գալիս է Ռուսաստանից:
Սա, ինքնաբերաբար, նշանակում է, որ դրանից առաջ մենք փրկվելու հնարավորություն չենք ունեցել և մեր հազարամյակների պատմության ընթացքում, առանց ռուսի չենք կարողացել ապրել: Բայց, նույն պատմությունը ցույց է տալիս, որ 1827-ից առաջ, մինչև Բագրատունիներ, Արշակունիներ, Արտաշիսյաններ, Երվանդունիներ, ուրարտացիներ, մենք ապրել ենք առանց ռուսի և Ռուսաստանի, հպարտանում ենք Տիգրան Մեծով, Ծովից ծով Հայաստանով:
Այդ ինչպե՞ս է եղել առանց Ռուսաստանի:
Ավելին, Հայոց պատմության ամենից մեծ ողբերգությունն ու արհավիրքը եղել է ցարական շրջանում՝ Հայոց ցեղասպանությունը:
Ես, անշուշտ, Հայոց ցեղասպանության մեջ ռուսներին չեմ մեղադրում, բայց 1915-1917 թվականների ժամանակահատվածը համապատասխանում է հայ-ռուսական շփումների ամենաակտիվ շրջանին: Չէ՞ որ մենք այդ ժամանակ ութ կամավորական ջոկատներ ստեղծեցինք և ռուսների հետ կռվեցինք Օսմանյան կայսրության դեմ:
Քանի դեռ մենք, որպես քաղաքական ազգ, չենք կարողացել ձերբազատվել «Ռուսաստանը մեր փրկիչն է» մտածողությունից, մենք չենք կարողանալու մեր տեղը գտնել այս տարածաշրջանում:
Նման մտածողությամբ մենք չենք ունենալու արտաքին քաղաքականություն և դիվանագիտություն, փոխարենն ունենալու ենք լոբբիզմ:
Ռուսաստանը ո՛չ մեր փրկիչն է, ո՛չ էլ թշնամին, Ռուսաստանը Ռուսաստանն է՝ իր գլոբալ և տարածաշրջանային շահերով, որոնք մի օր կարող են համընկնել մեր շահերին, մի օր՝ Ադրբեջանի ու Թուրքիայի, ինչպես եղավ 2020-ի պատերազմում և ինչպես այսօր է:
Ռուսաստանը մեզ չի խոստացել, որ փրկելու է: Այդ մենք ենք այդ ցանկությունը վերագրել ռուսներին և երբ նրանք չեն հասնում մեզ փրկության, նրանց մեղադրում ենք դավաճանության մեջ:
Մյուս կողմից, պետք է աշխատել և հայ-ռուսական թունավորված հարաբերությունները դուրս բերել ռացիոնալ և իրատեսական դաշտ»: