«Արցախցիները պետք է մերժեն Ռուսաստանի «հումանիտար օգնությունը»»․ Արման Բաբաջանյան

ԱԺ նախկին պատգամավոր Արման Բաբաջանյանի գրառումը․ «Արցախցիները պետք է մերժեն Ռուսաստանի այսպես կոչված «հումանիտար օգնությունը»: Այն ստորացուցիչ է։ Դա հանցագործի ձեռքով գցված մնացորդ է՝ այն բանից հետո, երբ այդ նույն հանցագործը քանդել է մեր տունը, սովամահ է թողել ընտանիքին և մասնակցել ամբողջ համայնքի բռնի արտաքսմանը։ Դա նույնքան ցինիկ է, որքան մարդասպանին տեսնել՝ ծաղիկով կանգնած զոհի հուղարկավորությանը։

Ռուսաստանը ոչ թե չկարողացավ պաշտպանել արցախցիներին, այլ՝ չցանկացավ։ Ավելին՝ իր գործողություններով և անգործությամբ լռելյայն նպաստեց արցախցիներին պատած մեծ ողբերգությանը։ Միջանցքը, որը պետք է բաց պահեր՝ փակեց։ Խաղաղապահ մանդատը, որը պետք է հարգեր՝ ոտնատակ տվեց։ Պատերազմը, որը պետք է կասեցներ, թույլ չտար՝ լուռ դիտեց։

Սա սրբապղծություն է։ Արցախցին մերժելով այս օգնությունը՝ մերժում է ստորացումն ու կեղծիքը։ Դա նշանակում է՝ «մենք չենք մոռացել, թե ինչ արեցիք մեզ»։ Դա նշանակում է՝ «մենք չենք դառնա ձեր արդարացման գործիքը»։

Մարդ, ով ձեռնունայն փախել է իր ծննդավայրից, ում տունն է այրվել, ում հարազատին է թաղել ճանապարհին, արժանի է գոնե մի բանի՝ ճշմարտության։ Իսկ ճշմարտությունն այն է, որ Ռուսաստանը դավաճանել է նրան, իսկ դավաճանի ձեռքից վերցված օգնությունը նվաստացում է։

Մերժումը՝ բեռ չէ։ Մերժումը՝ արժանապատվություն է։
Իսկ արժանապատվությունը Արցախում երբեք չեն նվիրել՝ միշտ վաստակել են»։