«Նախագիծը պետք է լավարկվի․ արժեքային տարընկալումների խնդիր կա»․ Արմեն Խաչատրյան

«Այս նախագիծը պետք է առավելագույնս լավարկվի․ բովանդակային քննարկումները շարունակվելու են»,- այս մասին լրագրողների հետ ճեպազրույցում նշեց «Քաղաքացիական պայմանագիր» խմբակցության պատգամավոր Արմեն Խաչատրյանը՝ ԱԺ պաշտպանության և անվտանգության մշտական հանձնաժողովի փակ նիստից հետո, որի ընթացքում քննարկվում էր պատգամավոր Հայկ Սարգսյանի առաջարկած՝ զինծառայությանն առնչվող նախագիծը:

«Հիմնական տարընկալումները և բազմակարծությունը, որ կան, գումարով կարճ ժամանակ ծառայելու նորմի հետ է կապված»,- ընդգծեց պատգամավորը: Նրա դիտարկմամբ՝ բանակի զորահավաքային պրոցեսն ավելի արդյունավետ դարձնելու լուրջ խնդիր կա, բայց նաև նախագծում հոդվածներ ու նորմեր կան, որոնք արժեքային տարընկալումների խնդիր կարող են ստեղծել:

«Եթե մաթեմատիկական հաշվարկով վերցնենք, այո՛, այն նախագիծն այս վիճակում ավելացնելու է մեր զորահավաքի ռեսուրսներն էլ, բանակի նյութական ռեսուրսներն էլ, դա ազդելու է պայմանագրայինների աշխատավարձի վրա դրական առումով: Եթե նույնիսկ այս վիճակով ընդունվի, իր դրական էֆեկտներն ունի: Բայց մենք ունենք արժեքային ընկալման խնդիր, երբ ասում ենք՝ փող - քիչ ծառայություն, մեր հանրությունը շատ հակասական ընկալումներ է ունենում, ինչը բնական է և հասկանալի»,- հավելեց Խաչատրյանը։