«Զարմացա, որ Համալիրում տեղի ունեցած հարսանիքը աղմուկ բարձրացրեց»․ Նիկոլ Փաշինյան

«Ոչ մի բան անվճար չէ, իսկ ինչն անվճար է, արժեք չունի»,- Կառավարության նիստի ժամանակ ասաց վարչապետ Նիկոլ Փաշինյանը՝ պետական մարմիններին անշարժ գույքը վարձակալությամբ տրամադրվելու նախագծի քննարկման շրջանակներում։

«Ցանկացած բանի համար կա վճար, ուղիղ է այդ վճարը, թե անուղղակի, երկրորդ հարց է։ Բայց ամեն ինչի համար պետք է վճարել։ Ո՞վ է վճարում՝ ուրիշ խնդիր է»,- ասել է նա։

Թաշինյանի խոսքով պետական գույքի նկատմամբ ընկալում կա, թե «Պետական գույք՝ դե, տվեք, տեսնենք՝ ինչ ենք անում»։ «Պետք է հասկանանք՝ որն ինչ արժի։ Ամեն ինչն արժեք ունի։ Այն, որ մենք էս աթոռների վրա նստած ենք, դա կոնկրետ արժեք ունի։ Մեկ ժամ այս աթոռի վրա նստելը գին ունի և այդ գինը վճարվում է։ Եթե չվճարվի, ինչ-որ պահի աթոռը կկոտրվի, ու չենք կարողանա օգտագործել»,- ասել է նա, ապա անդրադարձել օրեր առաջ Մարզահամերգային համալիրում տեղի ունեցած աղմկահարույց հարսանիքին։

«Զարմացա, որ աղմուկ բարձրացավ, թե Մարզահամերգային համալիրում հարսանիք է տեղի ունեցել։ Տարիներով Մարզահամերգային համալիրը քանդվում էր, ու մենք միլիարդներ ենք դնում, բայց չենք կարողանում կանգնեցնել քայքայման պրոցեսը։ Բա պետք է տնտեսվարությամբ զբաղվի, ասենք Մարզահամերգային համալիրում ի՞նչ պետք է տեղի ունենա, հակառակը պետք է քաջալերել»,- ասաց Փաշինյանը՝ հավելելով, որ նման դեպքում հարյուրավոր ընտանիքներ չեն գնա Դուբայում հարսանիք անեն։
Հիշեցնենք՝ օրեր առաջ Մարզահամերգային համալիրում տեղի էր ունեցել Vivaro-ի տնօրեն Վիգեն Բադալյանի եղբորորդու հարսանիքը։