«Էդ պոռոտախոսներից որևիցե մեկը թող փորձի մի ամիս առանց կնոջ ապրել»․ Միքայել Աջապահյան

«Կուսակրոնության խախտում-չխախտումը ներեկեղեցական դիսցիպլինար հարց է, դա դրսի մարդկանց չի վերաբերվում»,- 24TV-ի եթերում անդրադառնալով Նիկոլ Փաշինյանի՝ «Ի՞նչ է լինում, երբ պարզվում է, որ կուսակրոն հոգևորականը խախտել է կուսակրոնության ուխտը։ Նա զրկվում է պաշտոնից, աստիճանից և փիլոնից» գրառմանը, ասել է Միքայել արքեպիսկոպոս Աջապահյանը։ «Եթե կուսակրոնը խախտում է կուսակրոնության ուխտը, եկեղեցական ատյանը քննում է, վճիռ կայացնում։ Կուսակրոնի կյանքն էլ է ինտիմ կյանք ու ամեն սայթաքում, որ ունենում է, մեծ ողբերգություն է»,- շարունակել է Շիրակի թեմի առաջնորդը՝ տեղեկացնելով․ «Կուսակրոն հոգևորականը երեք ուխտ է կատարում՝ անպայմանավոր հնազանդություն, կամավոր աղքատություն և երրորդը՝ կուսակրոնություն։ Ընդ որում, երեքի մեջ էլ կարող է սայթաքել։ Կարող է երբեմն անհնազանդություն դրսևորել, բայց ներողություն խնդրել, կարող է գայթակղվել նյութականին՝ զղջալ, և կուսակրոնության մեջ, որ ամենախոցելին է։ Էդ պոռոտախոսներից որևիցե մեկը թող փորձի մի ամիս առանց կնոջ ապրել, մի շաբաթ թող փորձի առանց կնոջ ապրել․․․ Եթե հոգևորականն իր սայթաքումով դժբախտացրել է ինչ-որ մեկին, պիտի պատասխան տա, բայց եթե որևիցե արցունք չկա, բացի սեփականից, թողեք հոգևորականն ապրի իր սեփական ցավով»։ Նա հորդորել է հարգել այն ծանրությունն ու բեռը, որի տակ մտնում է հոգևորականը։