«Հարկի նկատմամբ պետք է ձևավորել հարազատություն»․ Նիկոլ Փաշինյան

«Էն, ինչը որ չկա, չկա, չկա, չկա, չկա․․․ինչի՞ պատճառով է, որ չկա։ Հարկ չլինելու պատճառով է, որ չկա, հարկ վճարելու նկատմամբ վերաբերմունքի պատճառով է, որ չկա»,- ԱԺ-ում պետբյուջեի նախնական քննարկման ժամանակ ասաց վարչապետ Նիկոլ Փաշինյանը՝ անդրադառնալով գույքահարկի բարձրացմանը։ «Շատ է քննարկվում գույքահարկի բարձր լինել-չլինելու հարցը, ես բոլոր դեպքերում ասում եմ, որ բոլոր այն քաղաքացիներին և գյուղացիներին, ովքեր խոսում են հարկի շատ լինելու մասին, ուղեկցենք և լուռ նայենք այն մանկապարտեզին, որը չի եղել։ Մենք մանկապարտեզներ ենք կառուցում այն գյուղերում, որտեղ հազարամյա պատմության ընթացքում չի եղել մանկապարտեզ։ Շատ ենք սիրում քաղաքակրթության մասին խոսել, բայց մեր գյուղերի փողոցների 90%-ը գոյության ողջ ընթացքում եղել է ցեխի մեջ։ Սա ասում եմ՝ ցույց տալու համար հարկի, բյուջեի և անհատի բարեկեցության կապը»,- ասաց Փաշինյանը՝ հավելելով, որ հարկային քաղաքականության շուրջ անհրաժեշտ է լայն ըմբռնում, որն առաջիկա ընտրությունների համատեքստում կքննարկեն քաղաքացիների հետ․ «Հարկի նկատմամբ պետք է ձևավորել հարազատություն»,- ասաց նա՝ եզրափակելով, որ հարկային համակարգը կատարյալ չէ։