«Հայ Առաքելական Եկեղեցու բացառիկ դերի մասին դրույթը Սահմանադրությունից հանելը նաև ԵՄ պահանջներից է»․ Նաիրա Զոհրաբյան

«Ինչու է Նիկոլ Փաշինյանը սուրն առած ընկել Հայ Առաքելական եկեղեցու և Վեհափառի հետևից․ շատ պարզ է, դա բացառապես ադրբեջանական օրակարգ է։ Խնդիրը Հայ Առաքելական Եկեղեցին վարկաբեկելն է, քանի որ հանրության շրջանում ամենամեծ վստահություն ունեցող կառույցը Եկեղեցին է»,- «Եվրոմեդիա24»-ի եթերում այս կարծիքը հայտնեց քաղաքական, հասարակական գործիչ, ԱԺ նախկին պատգամավոր Նաիրա Զոհրաբյանը։

Նրա դիտարկմամբ՝ Փաշինյանին անհրաժեշտ է, որ Հայաստանում որևէ վստահելի կառույց, ինստիտուտ, վստահելի ուժ չլինի, որպեսզի կարողանա կեղտոտ գորրծիքներով ապահովել իր վերարտադրությունը։

«Հայտնի է, որ նաև ԵՄ պահանջներից մեկն է, որ Հայ Առաքելական Եկեղեցու բացառիկ դերի մասին դրույթը ՀՀ Սահմանադրությունից հանվի, և Հայ Առաքելական Եկեղեցին պետք է ունենա այնքան իրավունք, ինչպիսին, օրինակ, Եհովայի վկաները, Հիսունականները, Կյանքի խոսքը, անգամ սատանիստական կրոնական կազմակերպությունները․ այսինքն, Հայ Առաքելական Եկեղեցին իջեցվի կրոնական աղանդի մակարդակի»,- նշեց Զոհրաբյանը։