«Ինչ Նիկոլ Փաշինյանի լեզվին է, դրա ճիշտ հակառակն իր մտքում ու ծրագրերում է»․ Սամվել Ֆարմանյան

ԱԺ նախկին պատգամավոր Սամվել Ֆարմանյանը ֆեյսբուքյան էջում տարածել է իր հարցազրույցի տեսանյութը՝ կից գրառմամբ․ «Ինչ Նիկոլ Փաշինյանի լեզվին է, մտքում ու ծրագրերում՝ դրա ճիշտ հակառակն է:
Ասաց Արցախը Հայաստան է և վերջ, իրական նպատակը Արցախը հանձնելն ու հայաթափելն էր: Ասաց կոռուպցիա՜ն ու թալա՜նը, իրական նպատակը աներևակայելի թալանչի ու կոռուպցիոներ դառնալն էր: Ասաց սեր ու հանդուրժողականություն, իրական նպատակը մեր երկրում բուն դրած մեծ ատելությունն է: Ասաց ժողովրդավարություն, իրական նպատակը պուճուր դուչե դառնալն էր: Ասում է Հայաստանը տանենք Արևմուտք, իրական նպատակը Արևմուտքի հետ թշնամանալն է: Ու էս շարքն իրոք անվերջ է:
Հիմա էլ: Երբ ասում է «խաղաղության օրակարգ», իրական ծրագիրը աշխարհաքաղաքական մանրադրամ դառնալն ու նոր պատերազմ հրահրելն է: Ասում է «ինքնիշխանություն», իրական նպատակը ինքնիշխանության զիջումն ու վաճառքն է: Ասում է «իրական Հայաստան», գլխում Հայաստանը պատմական դարձնելն է:
Ընդդիմությունից մեկ պահանջ կա. մաքրել Հայաստանը քաղաքական այս խուժանից: Ուրիշ սպասում ձեզանից ոչ մեկը չունի: Դուք դա խոստացել եք: Միայն այդ նպատակով եք դուք հայտնվել խորհրդարանում: Կատարե՛ք ձեր խոստումը»։