«Ապահովագրական ընկերությունները հրաժարվում են գյուղատնտեսների հետ պայմանագրեր կնքել»․ Գառնիկ Դանիելյան

Ապահովագրական ընկերությունները հրաժարվում են գյուղատնտեսների հետ պայմանագրեր կնքել։ Այս մասին այսօր ԱԺ-ում ահազանգեց ընդդիմադիր պատգամավոր Գառնիկ Դանիելյանը՝ անդրադառնալով շաբաթներ առաջ Արարատյան դաշտավայրում կարկուտից տուժած գյուղատնտեսներին փոխհատուցում տալու անհրաժեշտությանը․ «Մարդիկ կանգնում են փաստի առաջ, ապահովագրական ընկերությունը հրաժարվում է պայմանագիր կնքելուց, կարկուտը գալիս, 100%-ով վնասում է բերքը, մարդը չի կարողանում հարկային պարտավորությունը կատարել ու գնում է սննկացման։ Մենք պետք է ձեռք մեկնենք էդ մարդկանց, պետությունը անելիք ունի։ Արդյո՞ք գնահատում արվել է և արդյո՞ք փոխհատուցում տրվել է կարկուտից տուժած անձանց»,- ասաց Դանիելյանը՝ հարցն ուղղելով ՀՀ էկոնոմիկայի նախարարի տեղակալ Արման Խոջոյանին։ Վերջինս պատասխանեց, որ կարկտահարված տարածքների գնահատում, արձանագրումներ կատարվել են, խորհրդակցություններ են եղել և մոտեցումներ են մշակվել․ «Ապահովագրական ընկերությունների մասով նորություն չէ, գյուղատնտեսական ապահովագրությունը ՀՀ-ում ունի խնդիր այնպես, ինչպես ամբողջ աշխարհում, որը պայմանավորված է բնակլիմայական փոփոխություններով, կարկուտը դարձել է կրկնվող աղետ»,- ասաց Խոջոյանը՝ նշելով, որ տարբեր ծրագրեր են իրականացվում՝ բերքը պաշտպանելու և ռիսկերին դիմակայելու նպատակով։