«Վերջին ամիսների հայաստանյան ներքաղաքական օրակարգն արհեստական բնույթ է կրում»․ Գարեգին Պետրոսյան

«Այլընտրանք» ՀԿ համանախագահ, քաղաքագետ Գարեգին Պետրոսյանի ֆեյսբուքյան գրառումը․ «Վերջին ամիսների հայաստանյան ներքաղաքական ամբողջ օրակարգը արհեստական բնույթ է կրում։ Սա վերաբերում է թե՛ Նիկոլի ու Աննայի «արտասովոր» պահվածքին, թե՛ իմպիչմենտին ու Եկեղեցու և Կաթողիկոսի շուրջ ծավալվող անցուդարձին։
Զավեշտ հիշեցնող այս օրակարգը ունի երկու պատճառ և մեկ հիմնական նպատակ։ Պատճառներից առաջինը մտահոգությունն է՝ կապված նախընտրական տարում ներկայիս իշխանության ցածր վարկանիշի հետ, երկրորդը՝ ընտրությունների միջոցով իշխանությունը կորցնելու, և հետևաբար այսպես կոչված հեղափոխությունը ձախողելու վտանգն է։
Նպատակը քաղաքական ընդդիմության շրջանում նոր կոնֆիգուրացիա ձևավորելն է, որտեղ երկրորդ նախագահը կունենա անհամեմատ թույլ կշիռ, ինչը կբացառի Գյումրու սցենարի կրկնությունը համապետական մակարդակով։ Իսկ Գյումրու սցենարի համապետական կրկնությունը կնշանակ «հեղափոխության» վախճանաբանական ավարտը։
Իրավիճակային կոմբինացիաները կարող են լինել բազմաթիվ, արհեստական օրակարգ ձևավորելու իրական շարժառիթը, սակայն, հիմնված է վերը նշված երկու պատճառների և մեկ նպատակի վրա»։