«Ստիպում են, որ պարտադիր թալանվես»․ Աննա Ավետիսյան

Երևանի ավագանում «Մայր Հայաստան» խմբակցության անդամ Աննա Ավետիսյանի ֆեյսբուքյան գրառումը․ «Վաղը, քաղաքային իշխանության նախաձեռնությամբ, Ազգային ժողովի արտահերթ նիստում քննարկվելու է տրանսպորտի թանկացման դեմ բոյկոտող՝ չվճարող քաղաքացիներին տուգանելու օրենսդրական փաթեթը։
Անհիմն ամեն ինչ թանկացնելու որոշումները հերիք չեն, մի հատ էլ տուգանքով են ուզում ստիպեն, որ ուզես թե չուզես պարտադիր թալանվես։
Իսկ ո՞վ է պատասխանատու այն «բարեփոխումների» համար, օրինակ վերջին շրջանում կատարված երթևեկության փոփոխությունները, ճանապարհային գծանշումները, որոնց հետևանքները տեսնում ենք ամեն օր վթարների տեսքով և որոնք արժենում են առողջություն, նյարդեր և բազմաթիվ անհարմարություններ»։
Նշենք, որ այսօր Երևանի քաղաքապետարանի գործակարգավարական խորհրդակցության ժամանակ Տիգրան Ավինյանն ասել էր․ «Ունենք քաղաքացիներ, ովքեր մտածում են՝ միգուցե եկել է անվճար տրանսպորտային երթևեկության ժամանակը։ Հարգելի քաղաքացիներ, այդ ժամանակն ավարտվում է։ Հատուկ ուզում եմ նախազգուշացնել, որ հետո չասեն՝ բա ինչու այսպես եղավ։ Օրենսդրական փաթեթ է քննարկվելու վաղը Ազգային ժողովում, որով արդեն նախատեսվում է հստակ տուգանք տրանսպորտային միջոցից օգտվելիս չվճարելու, չվավերականացնելու համար»։