«Իշխանությունը թիրախավորել է ազնվականությունը և մասնավոր սեփականության իրավունքը». Վարդան Բալյան

Քաղաքական վերլուծաբան Վարդան Բալյանի ֆեյսբուքյան գրառումը. «Միջնադարյան Եվրոպայում ազնվականությունը՝ արիստոկրատիան հանդիսացել է քաղաքական ազատության սկզբունքի կրողը և երաշխավորը՝ նպաստելով եվրոպական լիբերալ ավանդույթի կայացմանը և զարգացմանը: Ազատության արիստոկրատական ավանդույթը կապված էր ֆեոդալի ամրոցի հետ, որ ապահովում էր նրա պաշտպանությունը սյուզերենի կամայականությունից, և ծագուգմանաբանության սակրալացման, որ ազնավականության մոտ ձևավորում էր իշխանությունից ի ծնե անկախության և իրենց իրավունքների, իրավունակության ընկալում:
Ազնվականության ձևավորման և պահպանման առումով սկզբունքային է սեփականության իրավունքների երաշխիքները, քանի որ սեփականության իրավունքը անքակտելիորեն կապված է անձնական, քաղաքական և տնտեսական իրավունքների հետ՝ հանդիսանալով հիմքը: Անհատի նկատմամբ հարգանքն առանց մասնավոր սեփականության նկատմամբ հարգանքի, սեփականության նկատմամբ հարգանքն՝ առանց անհատի նկատմամբ հարգանքի անհնար է:
Հայկական իրականության մեջ ազնվականության և մասնավոր սեփականության իրավունքների համադրումը իր արտահայտությունն է գտել հայրենատիրության հասկացության մեջ:
Շատերն ինձ հարցնում են, թե ինչո՞ւ եմ քննադատում գործող իշխանության քայլերը՝ կապված Շիրակի թեմի առաջնորդ գերաշնորհ տեր Միքայել Սրբազանի և գործարար ու բարերար Սամվել Կարապետյանի հետ: Իրավաբանության տեսակետից թույլ մեղադրանքի խնդիրը հարցի մեկ կողմն է, երկրորդն այն է, որ գործող իշխանությունը թիրախավորել է ազնվականությունն՝ ի դեմս Աջապահյանի, որ սերում է Հեթումյան տոհմից, և մասնավոր սեփականության իրավունքը՝ ի դեմս Սամվել Կարապետյանի, այսինքն՝ թիրախավորվել է հայրենատիրությունը հերթական անգամ: Գրառման սկզբում անդրադարձա եվրոպական լիբերալ ավանդույթին, իշխանության գործողություններն այդ համատեքստում ուղղակի հարված են, խաչակրաց արշավանք են ազատության լիբերալ գաղափարաբանության ու արժեքների դեմ: Սրանից վատ, շատ վատ հոտ է գալիս, ինչի փորձառությունն, ի դեպ, ունենք հենց մեր պատմության մեջ: Հայրենատիրության ոչնչացումը, ճնշումն է, որ դարավոր պետականազրկման գլխավոր պատճառներից մեկն է եղել մեզ համար»: