«Ո՞նց կարող են ՀՀ քաղաքացիություն չունեցող անձինք ՀՀ-ում քաղաքական գործունեություն ծավալել»․ Նիկոլ Փաշինյան

Վարչապետ Նիկոլ Փաշինյանն այսօր ԱԱԾ աշխատակազմին է ներկայացրել նորանշանակ տնօրեն Անդրանիկ Սիմոնյանին։ Փաշինյանն իր խոսքում նշել է, որ Ազգային անվտանգության ծառայությունն արդյունավետորեն դիմակայում է բազմաթիվ մարտահրավերների, որոնց առաջ կանգնած է մեր պետությունն ու ժողովուրդը: «Բոլոր մարտահրավերները, որոնք կարող էին ապակայունացնել Հայաստանի Հանրապետությունը և անվտանգային մարտահրավերներ ստեղծել, մինչև այս պահը հաջողությամբ չեզոքացված են»,- ասել է նա՝ անդրադառնալով «ազդեցության գործակալների ինստիտուտին»: «Այս գործունեության ձևի նկատմամբ պետք է կոնկրետ վերաբերմունք արտահայտելու հնարավորություն ունենանք․․․այն հիբրիդային սպառնալիքների համատեքստում թիրախավորում է մեր պետությունը և ինքնիշխանությունը։ Մեր երկրում երևույթներ կան, որոնք շարունակաբար հանդուրժում ենք, բայց աշխարհի ուրիշ ոչ մի երկրում նման բան չեն հանդուրժի։ Օրինակ՝ ՀՀ քաղաքացիություն չունեցող անձինք ՀՀ-ում կարող են քաղաքական գործունեություն ծավալել, ընդ որում՝ ամենառադիկալ հայացքներ արտահայտել։ Մենք պետք է ունենանք մեխանիզմներ, անհրաժեշտության դեպքում օրենսդրության փոփոխություններ անենք, նման դեպքերում արձագանքելու համար։ Ո՞նց կարող են ՀՀ քաղաքացիություն չունեցող անձինք ՀՀ-ում քաղաքական գործունեություն ծավալել, սահմանադրական կարգը տապալելուն ուղղված ինչ-որ կոչերով հանդես գալ, սա անթույլատրելի է և որպես ՀՀ վարչապետ չեմ կարող նման բան հանդուրժել»,- ասաց Փաշինյանը։