«Դիմադրողականության կենտրոնները վերացնելու ուղղությամբ է աշխատում»․ Սուրեն Սուրենյանց

«Պետական ռեկետի մասին օրենք է․ դա սեփականության վերաբաժանում է բոլշևիկյան մեթոդներով, կուլակաթափություն է, ինչպես էլ իրենք ձևակերպեն։ Դա բերելու է նրան, որ կապիտալը փախչելու է Հայաստանից»,- «24Նյուզ»-ի եթերում այս տեսակետը հայտնեց քաղաքագետ Սուրեն Սուրենյանցը՝ անդրադառնալով ՀէՑ-ը պետականացնելու հնարավորություն ընձեռող օրինագծի ընդունմանը։

Սուրենյանցի դիտարկմամբ՝ Փաշինյանը երկու խնդիր է փորձում լուծել։ «Առաջինը՝ անցումն է տոտալիտար կառավարման, հասարակական բոլոր ոլորտները վերահսկելու խնդիր է դնում։ Փաշինյանը, թերևս, հաշվարկել է, որ առանց այդ խնդիրների լուծման, չի կարող վերարտադրվել 2026 թվականին, ամեն ինչ անում է, որ 2026-ի ընտրությունները դառնան ձևական միջոցառումներ՝ առանց բովանդակության։ Հաջորդ փուլում որոշելու է՝ ով կարող է մասնակցել ընտրություններին․․․ Երկրորդը՝ «իրական Հայաստանի» կոնցեպտն է, որը թուրք-ադրբեջանական վասալիտետի քողածածկույթն է, և այդ կոնցեպտը ենթադրում է ազգային ինստիտուտների, ազգային քաղաքակրթական բոլոր արժեքների դեմ հետևողական պայքար։ Մարդը, որը խոստանում էր Հայաստանը ռուսական ուղեծրից տանել Արևմուտք, հիմա Հայաստանը դրել է թուրք-ադրբեջանական աքցանի մեջ, և դիմադրողականության կենտրոնները վերացնելու ուղղությամբ է հիմա աշխատում»,- պարզաբանեց քաղաքագետը։