«Համոզված եմ՝ հավաքներին մասնակցելու նպատակով նյութապես շահագրգռելը ապաքրեականացվելու է»․ Վարազդատ Հարությունյան

Փաստաբան Վարազդատ Հարությունյանի ֆեյսբուքյան գրառումը․ «Այսօրվա խուզարկությունների համատեքստում արժե տեղեկացնել, որ Վենետիկի հանձնաժողովն օրակարգ է ընդունել ՀՀ քրեական օրենսգրքի 236-րդ հոդվածի 2-րդ մասի (հավաքներին մասնակցելու նպատակով նյութապես շահագրգռելը) համապատասխանության հարցը Եվրոպական ստանդարտներին (իրավական որոշակիության մասով):

Վենետիկի հանձնաժողովին Amicus curiae տրամադրելու խնդրանքով դիմել էր ՀՀ սահմանադրական դատարանը:
Խնդրո առարկա հոդվածի հակասահմանադրականության հարցը բարձրաձայնում ենք դեռևս 2022թ. մայիսից, երբ (եթե չեմ սխալվում) այն առաջին անգամ կիրառվեց Ավետիք Չալաբյանի նկատմամբ:
Հանձնաժողովի կարծիքը հրապարակվելու է այս տարվա հոկտեմբերին ու գրեթե վստահ եմ, որ այն առնվազն հաստատելու է մեր այն պնդումը, որ հոդվածն իրավական որոշակիության լուրջ խնդիր ունի: Համոզված եմ, որ այս հոդվածը ջանասիրաբար կիրառողները նույնպես համոզված են, որ հավաքներին մասնակցելու նպատակով նյութապես շահագրգռելը ոչ հեռու ապագայում ապաքրեականացվելու է»: