«Մենք հեռանում ենք․ 3 ժամ է թույլ չեն տալիս տեսնենք մեր պաշտպանյալներին»․ փաստաբաններ

Ինչպես հայտնել ենք ՀՅԴ երիտասարդներ են ձերբակալվել, տեղափոխել Երևան քաղաքի քննչական վարչություն։ Փաստաբաններին թույլ չեն տալիս հանդիպել իրենց պաշտպանյալների հետ։ Նրանք արդեն 3 ժամ է Քննչականի դիմաց սպասում են։ Փաստաբան Սերգեյ Հարությունյանի խոսքով ամեն օր բախվում են մի իրավիճակի, երբ արդեն գործ չունենք իրավունքի ու իրավաբանության հետ և որ այս ամենը շոու է. «Վստահ եմ, որ այս շենքում պրոֆեսիոնալ իրավաբաններ են, նրանք այս վարույթի նյութերին ծանոթանալով ու տղայի ցուցմունքը լսելուց հետո լիարժեք հասկացել ու պատկարացրել են, որ խոսք է գնում ընդամենը սպորտաձևի մասին»,- լրագրողների հետ զրույցում ասաց փաստաբան Սերգեյ Հարությունյանը՝ շեշտելով, որ սպորտային խաղերի համար նախատեսված ինչ-որ գնդերի համար են ձերբակալել երիտասարդներին։ Նա ՀՅԴ ԳՄ անդամ Վահագն Մատինյանի պաշտպանն է։ Հարությունյանի խոսքով այս ամենը շոու է՝ հանրության ուշադրությունը շեղելու նպատակով։
Նշենք, որ ՔԿ-ի հաղորդմամբ 7 անձ է ձերբակալվել։

Փաստաբան Սերգեյ Հարությունյանը հայտարարեց՝ պաշտպաններով որոշել են հեռանալ, քանի որ քննչական կոմիտեում չունեն անելիք։

«Մենք՝ փաստաբաններս, որոշում կայացրեցինք, որ մենք այստեղ անելիք չունենք, որովհետև սա հերթական ապօրինի «մասկի շոուն» է լինելու, հերթական ահաբեկչական ինչ-որ խմբավորում հայտնաբերելն է լինելու, նույնիսկ ՄԻՊ աշխատակիցների գալուց հետո թույլ չեն տվել մուտք գործել, հասկացել ենք, որ մեր մասնակցությունով մենք լեգիտիմացնելու ենք այս գործընթացը»,- ասաց նա։