«Կոռուպցիան ոչ միայն չվերացավ, այլ ավելի ծաղկեց»․ Մհեր Մելքոնյան

ԱԺ «Հայաստան» խմբակցության պատգամավոր Մհեր Մելքոնյանի ֆեյսբուքյան գրառումը․ «2018 թվականին Փաշինյանն ու իր թիմը խոստացան «զրոյական հանդուրժողականություն» կոռուպցիայի հանդեպ, թափանցիկ կառավարում և ժողովրդավարական վերահսկողություն պետական համակարգում։
Սակայն յոթ տարի անց հստակ է մի բան՝ կոռուպցիան ոչ միայն չվերացավ, այլ ավելի ծաղկեց:
Ի՞նչ ունենք այսօր.
Պետական բարձր պաշտոնյաներ, ովքեր կարճ ժամանակում դառնում են բիզնես ունեցվածքի տերեր՝ առանց բացատրության, առանց հաշվետվության։
Պետական գնումների համակարգ, որը չի ծառայում մրցակցությանը, այլ ընտրովի մատակարարներին։ Արժեքները ուռճացված են, պատասխանատվությունը՝ զրո։
Կոռուպցիայի կանխարգելման հանձնաժողով, որը գրեթե լուռ է, երբ խոսքը վերաբերում է իշխանության ներկայացուցիչներին:
Ապօրինի հարստացման բազմաթիվ դեպքեր՝ առանց իրավական հետևանքի։
Թափանցիկության պակաս՝ մարզային բյուջեներից մինչև խոշոր պետական ծրագրեր։
Այսօր պետք է հստակ ասել՝
-Փաշինյանի իշխանությունը դավաճանեց իր իսկ խոստումներին։
- Ժողովրդի վստահությունը օգտագործվեց իշխանությունը սեփականացնելու համար:
-Կոռուպցիան դարձել է օրվա իշխանության կենսակերպը, իսկ անպատժելիությունը՝ համակարգի գրավականը։
- Արդարադատությունը դարձել է իշխանության գործիք՝ ոչ թե օրինականության պահապան, այլ քաղաքական հաշվեհարդարի միջոց։
-Պետական համակարգում հաստատվել է կլանային մտածողությունը։ Գնումները շարունակվում են՝ առանց մրցույթների, առանց թափանցիկության։
Ինչ է սա, եթե ոչ՝ ժողովրդին բացահայտ և համակարգված խաբեություն:
Փաշինյանական հակազգային իշխանության մոտ կոռուպցիան դարձել է հստակ գործելաոճ:
Հայաստանը չի կարող կառուցվել ստի, խարդախության և կեղծ արդարության վրա»։