«Մի քանի հազար տարի նույն սխալը կրկնելը, միգուցե, մի օր այլևս չներվի». Տարոն Սիմոնյան

ԱԺ նախկին պատգամավոր Տարոն Սիմոնյանի ֆեյսբուքյան գրառումը․ «Սա էլ կանցնի...
Բայց ի՞նչ կմնա սրանից հետո հենց մեզանում՝
դատարկությո՞ւն, որ գալիս է սկզբունքներից հետո, ինչը փորձում ենք լցնել ինչ-որ կեղծ կուռքերով, մերժո՞ւմ, որով խուսափենք ընդունել իրականությունը, թե՞ ճանաչում, որ մենք մեզ նաև այսպիսին ճանաչենք, որ հաճախ զարմանքից չանշարժանանք ...
Դրության իռացիոնալիզմը նրանում է, որ հերթական ցեղասպանության և հայրենազրկման թշնամու անթաքույց քաղաքականությունը բգներիս, փոխանակ մոռանանք մեր հակասություններն ու միավորվենք, անխնա ջլատվում ու պառակտվում ենք միայն նրա համար, որ ցույց տանք, թե մեր մի բուռ «ճշմարտությունը», որ հավաքել ենք պատահաբար ու հիմնականում՝ չիմացությունից, ինչքան առավել է, քան մյուս հայինը։
Հերթական ցեղասպանության և հայրենազրկման թշնամու անթաքույց քաղաքականությունը բգներիս, փոխանակ սկսենք օգտագործել մեր բանականությունը, անխնա արհամարհում ենք ամեն բանականն ու տրվում հույզերին՝ գոռալու ու կենդանականի մեջ տեսնելով մեր «քաղաքականությունը»։
Հերթական ցեղասպանության և հայրենազրկման թշնամու անթաքույց քաղաքականությունը բգներիս, փոխանակ կառուցենք Հոգևոր Հայաստանը, քանդում ենք այն, ինչ նրա էությունն է ու արմատը։
Սա էլ կանցնի ու հերթական պատահական հրաշքից, բայց իրականում առանձին անձերի զոհողության շնորհիվ Հայքը կշարունակի իր ընթացքը, ու ի՞նչ կմնա մեզնում ...
Չէ, սկզբից պետք է սկսենք, որովհետև մի քանի հազար տարի նույն սխալը կրկնելը, միգուցե, մի օր այլևս չներվի»։