Տիգրան Ավինյանի կեղծ չեզոքությունը. «Ժողովուրդ»

«Ժողովուրդ»-ը գրում է. «Երևանի քաղաքապետ Տիգրան Ավինյանն առայժմ աչքի է ընկնում չափազանց զգուշավորությամբ՝ Հայ Առաքելական եկեղեցու շուրջ ստեղծված իրավիճակի և վերջին շաբաթների հակաեկեղեցական գործողությունների համատեքստում։
Ի տարբերություն իշխանական թիմի բարձրաձայնող անդամների՝ Ավինյանը չի գրում ֆեյսբուքյան ստատուսներ, հրապարակային հայտարարություններով հանդես չի գալիս և խուսափում է կտրուկ գնահատականներից, անգամ երբ հարցը վերաբերում է երկրում ամենահին ազգային կառույցներից մեկին՝ Հայ Առաքելական եկեղեցուն։
Նախօրեին «Մոսկվա» կինոթատրոնի բակում լրագրողների հետ ճեպազրույցում անդրադառնալով ձերբակալություններին և եկեղեցու շուրջ ձեւավորված լարվածությանը՝ Ավինյանն ասաց. «Կեղծավորության մեջ ապրելը և, այսպես ասած՝ արհեստականության մեջ ապրելը սխալ բան է։ Որոշ դեպքերում պետք է ճշմարտություններ բարձրաձայնվեն, և այդ ճշմարտությունների հետևից նաև գնալ է պետք։ Եվ այն ամենին ինչի վրա երկար ժամանակ աչք է փակվել՝ որոշ հանգամանքներից ելնելով, վաղ թե ուշ պետք է վերջ տրվի. դա կեղծավորություն է»։
Լրագրողների հարցին, թե կմիանա Փաշինյանի՝ «Վեհարանը կաթողիկոսից ազատելու» գործընթացին, Ավինյանի պատասխանը էլ ավելի դիվանագիտական էր. «Կարծում եմ՝ ամեն մարդ իր տեղում իր գործը կատարելու է»։

Սակայն, ըստ մեր աղբյուրների փոխանցման, քաղաքապետը թիմակիցների նեղ շրջանակում պարզաբանել է՝ ինքը չի ցանկանում որևէ կերպ մասնակցել հակաեկեղեցական արշավին՝ այն համարելով անթույլատրելի։ Արդյոք սա հստակ տարանջատում է ՔՊ ներսում, թե պարզապես քաղաքական հաշվարկ է, առայժմ դժվար է միանշանակ ասել»։

Մանրամասները՝ թերթի համարում: