«Եթե Փաշինյանը հավաք անի Մայր Աթոռում, կհանդիպի հակազդեցության». Քրիստինե Վարդանյան

«Կարծում եմ, որ Փաշինյանի՝ Եկեղեցու դեմ հարձակման հետաձգման պատճառներից մեկն այն է, որ մի կողմից չի ստացվում իր պատկերացրած չափով մոբիլիզացիա, իսկ հակառակ կողմում կոնկրետ մոբիլիզացիա նկատվում է»,- «168TV»-ի եթերում ասել է ԱԺ «Հայաստան» խմբակցության պատգամավոր Քրիստինե Վարդանյանը:

Նա հորդորեց չմասնակցել Փաշինյանի սրբապիղծ հավաքին, «որովհետև դա մեղք է ամբողջ կյանքի համար, և հանցագործություն է, որի համար Փաշինյանը կարող է հետո ինչ-որ պատճառաբանություններ բերել, բայց մասնակիցները պատասխանատվություն են կրում, և երկրորդը՝ խոսքը այդ նույն պահին Մայր Աթոռում մեր ներկայությամբ մեր անվերապահ աջակցությունը մեր եկեղեցուն հայտնելու մասին է»:

Հարցին, թե «այսինքն՝ եթե Փաշինյանը հավաք անցկացնի Եկեղեցու տարածքում, ընդդիմությունը Մայր Աթոռում է լինելո՞ւ», պատգամավորը պատասխանեց. «Ընդդիմությունը չէ, ավելի լայն՝ հասարակությունը, որ աջակցում է եկեղեցուն, նաև ընդդիմության կազմակերպմամբ լինելու է Մայր Աթոռում՝ խաղաղ հավաքի: Փաշինյանը պետք է իմանա, որ եթե ինքը գնում է այդպիսի գործողության, հանդիպելու է հակազդեցության: Հակազդեցությունը լինելու է խաղաղ, լինելու է ներկայությամբ, և այդ ներկայության չափն ու մասշտաբներն են, որ ցույց են տալու աջակցությունը, ոչ թե՝ բռնի գործողությունները»: