«Ստոկհոլմի դատարանի որոշմամբ Արևմուտքը գործարք է առաջարկում Սամվել Կարապետյանին»․ Հայկ Այվազյան

«Լույս» տեղեկատվական-վերլուծական կենտրոնի տնօրեն Հայկ Այվազյանի ֆեյսբուքյան գրառումը. «Ստոկհոլմի արբիտրաժային դատարանի՝ Սամվել Կարապետյանի օգտին ընդունած որոշման մասին։ Հայացք կողքից։
«Տաշիր» խմբի սեփականատեր, գործարար Սամվել Կարապետյանը և նրա ընտանիքը հաղթեցին Ստոկհոլմի միջազգային արբիտրաժային դատարանում՝ ՀՀ կառավարության դեմ ներկայացված հայցում, կապված «Հայաստանի էլեկտրական ցանցեր» ՓԲԸ-ի ազգայնացման հետ։
Կարապետյանի թիմը տոնում է հաղթանակը, շատերն ուրախանում են, ընդդիմությունը սա օգտագործում է որպես փաստարկ իշխանության դեմ և այլն։
Սակայն ոչ ոք չի տալիս այն հարցը, թե ինչո՞ւ է Ռուսաստանի դեմ պատերազմ վարող Արևմուտքի դատական ինստիտուտներից մեկը հանկարծ որոշում ընդունում Կարապետյանի օգտին։
Բանն այն է, որ այն մարդը, ով իր վրա կվերցնի Հայաստանը ներկայիս ծանրագույն վիճակից դուրս բերելու պատասխանատվությունը, անխուսափելիորեն կմտնի սուր հակասության, նույնիսկ կոնֆլիկտի մեջ Արևմուտքի հետ։ Դա պարզապես անխուսափելի է։
Այս պարագայում այդ մարդը պետք է պատրաստ լինի նրան, որ շատ բան է կորցնելու։ Դա այդ ճանապարհի գինն է։ Այն ծանր ճանապարհ է։
Ստոկհոլմի դատարանի այս որոշմամբ Արևմուտքը անուղղակիորեն գործարք է առաջարկում Կարապետյանին՝ պահպանել էլեկտրացանցերը կամ լավ գումար ստանալ դրանց դիմաց, առաջիկայում ազատության մեջ հայտնվելու հնարավորություն ստանալ՝ Հայաստանի համար իրական պայքարի մեջ չմտնելու դիմաց։
Ես ամենևին չեմ փորձում ակնարկել, թե Կարապետյանը պետք է այս կամ այն ընտրությունն անի։ Դա իր որոշելիքն է։
Ես պարզապես կանխատեսում եմ, որ եթե Սամվել Կարապետյանը որոշի մտնել իրական պայքարի մեջ, ապա նա անխուսափելիորեն կմտնի հակասությունների մեջ Արևմուտքի հետ, կկորցնի էլեկտրացանցերը, և գուցե ոչ միայն դա։
Անհնար է մտնել իրական քաղաքական պայքարի մեջ Հայաստանի համար և միաժամանակ պահել էլեկտրացանցերը։ Եթե որևէ մեկը խորհուրդ է տալիս, թե դա հնարավոր է, ապա դա միանշանակ փակուղի է և պարտություն»։