«Հույսը դրել են դրսից ժամանող «ձյաձյաների» վրա»․ Արմինե Օհանյան

«Հրապարակ» օրաթերթի գլխավոր խմբագիր Արմինե Օհանյանի ֆեյսբուքյան գրառումը․ «Ինձ համար նույնքան մերժելի ու զզվելի են բոլոր «պապա» կանչողները, լինի Ռուսաստանից, թե Արևմուտքից։ Ինձ անհասկանալի են այն փորձագիտական շրջանակները, որոնք օրը 24 ժամ, տարբեր հարթակներից ներշնչում են մարդկանց՝ «քանի դեռ Նիկոլը ձեռնտու է «դրսին»՝ մնալու է», կամ՝ «Նիկոլը դեռ չի ավարտել իր գործը, ավարտի՝ նոր կգնա», «Նիկոլի մնալ-չմնալու հարցը Հայաստանում չի որոշվում»։ Նույնքան տհաճ են նաև այն հայտարարությունները, թե՝ «Նիկոլը չեկավ, իրեն բերեցին դրսի ուժերը»։
Այս բոլոր հայտարարությունները սնվում են նույն աղբյուրից․ հայի խեղճությունից, անկարողությունից, իմպոտենտությունից, իր ճակատագիրը կերտելու անընդունակությունից, իր դաժան ճակատագրի ու վատ կյանքի հետ հաշտված ստրուկի, ճորտի, հիվանդի գենից։ Նման բան ասողները կարծես բարձր ձայնով բղավեն՝ ես ի վիճակի չեմ ոչինչ անելու, ես միայն կարող եմ ուրիշների հետեւից գնալ, ուրիշների կառուցած երկրում ապրել, ուրիշների հովանու տակ գոյատևել․․․
Հենց հայի այս գենն է պատճառը, որ մեր ազգը սփռվել է աշխարհով մեկ, բնակություն հաստատել աշխարհի տարբեր երկրներում, փոխանակ մնային, պայքարեին, փորձեին իրենց երկիրը կառուցել, լավ իշխանություն ձևավորել։ Հիմա նույն խեղճ ու թուլամորթ հայ մարդիկ հույսը դրել են Աստծու, ֆորս-մաժորի, աշխարհաքաղաքական զարգացումների, դրսից ժամանող «ձյաձյաների» վրա, որոնք մի գեղեցիկ օր կգան և կտանեն Նիկոլին, իսկ նրա տեղը մի նորմալ մարդ կդնեն։ Ընդ որում, անգամ այդ նորին իրենք չեն տեսնում, չեն աճեցնում, չեն թողնում աճի, հակառակը՝ ամեն ինչ անում են փչացնելու, ներքև քաշելու, նրա ճանապարհին հազար խոչընդոտ հարուցելու համար։ Եւ այդ նորի հետ կհաշտվեն միայն այն դեպքում, երբ այդ գերբնական դրսի ուժերը վերջինիս մի անակնկալ օր բերեն՝ նստեցնեն Հայաստանի կառավարչի աթոռին։
Մեր ընդդիմության, լրատվամիջոցների, փորձագետների միակ խնդիրը պետք է լիներ այս խեղճի, ստրուկի, հաշտվածի հոգեբանությունից մարդկանց ազատելը։ Բայց նրանք բոլորը միայն խորացնում ու խրախուսում են այդ հոգեբանությունը»։