«Մետաղական ջարդոնի անվան տակ ՀՀ-ից գործարանների սարքավորումներ էին արտահանվում»․ Գևորգ Պապոյան

«Հայաստանը մետաղի ջարդոն արտահանող երկրից վերածվել է պատրաստի մետաղական արտադրանք թողարկող և ներքին շուկան ամբողջությամբ բավարարող, ինչպես նաև արտահանման հավակնություն ունեցող երկրի»,-Կառավարության նիստում ասաց Էկոնոմիկայի նախարար Գևորգ Պապոյանը՝ ներկայացնելով պողպատե ամրանների ներմուծման լիցենզավորման ընթացակարգը և հիմնական լիցենզիայի ձևը սահմանելու մասին որոշման նախագիծը։

«Տասնամյակներ շարունակ Հայաստանից մետաղական ջարդոնի անվան տակ արտահանվում էին գործարանների սարքավորումներ, ամբողջ հոսքագծեր, տարբեր տեսակի մետաղներ, ավտոմեքենաների կմախքներ։ Հետո կառավարությունը որոշեց տուրք դնել, և որոշակի խոչընդոտներ ստեղծվեցին դրանց արտահանման հետ կապված»,- ասաց Պապոյանը՝ հավելելով, որ այս ամենի արդյունքում Հայաստանում ստեղծվել են մետաղների մշակման ձուլարաններ, գործարաններ։