«Հայաստան-ԱՄՆ գործընկերությունը բացում է նոր դարաշրջան՝ իրական ինքնիշխանության ուղղությամբ»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը. «Աշխարհաքաղաքական շրջադարձի եզրին կանգնած Հայաստանը պետք է որդեգրի վճռական ու հստակ ուղի։ Վաշինգտոնում ստորագրվելիք համաձայնագրերը ոչ միայն իրական հնարավորություն են խաղաղության համար, այլ նաև վերահաստատում են ԱՄՆ-ի դերակատարությունը որպես Հայաստանի ինքնիշխանության, անվտանգության ու զարգացման գլխավոր գործընկեր։ Այս նոր փուլի մեկնարկը պահանջում է արագորեն սկսել ՀԱՊԿ-ից և ԵԱՏՄ-ից դուրս գալու գործընթացը։ Ռուսական կառույցները երկար ժամանակ կանխել են մեր պետական սուբյեկտության լիարժեք դրսևորումը, և այսօր դրանց հետ կապը դարձել է վտանգավոր քաղաքական բեռ։
Միևնույն ժամանակ, Հայաստանը պետք է մեկնարկի Եվրամիությանն անդամակցության ճանապարհային քարտեզի շուրջ բանակցությունները՝ որպես մեր քաղաքակրթական ընտրության շարունակականություն։
Հայաստան-ԱՄՆ գործընկերությունը, հիմնված արժեքների և երկարաժամկետ շահերի համադրության վրա, բացում է մի նոր դարաշրջան՝ իրական ինքնիշխանության, անվտանգ հաղորդակցման ու տարածաշրջանային դերակատարության վերականգնման ուղղությամբ։ Հայաստանը պետք է պատրաստ լինի խորքային վերափոխումների՝ քաղաքականից մինչև անվտանգային ճարտարապետություն։ Սա պատմական հնարավորություն է՝ կերտելու ինքնավստահ ու ազատ պետություն»։