«Այս պահին պատերազմի իմաստ չկա, որովհետև Ադրբեջանը ստանում է այն ամենը, ինչ պահանջում է Փաշինյանից»․ Գեղամ Մանուկյան

«Վաշինգթոնյան փաստաթղթով բոլորը բավարարվեցին՝ բացառությամբ հայ ժողովրդի և ՀՀ-ի»,- այս մասին «Եվրոմեդիա24»-ի եթերում նշեց ԱԺ պատգամավոր Գեղամ Մանուկյանը՝ անդրադառնալով օգոստոսի 8-ին Թրամփի միջնորդությամբ Փաշինյանի և Ալիևի միջև ստորագրված հռչակագրին։

«Ալիևը բավարարվեց, քանի որ ստորագրություն դրեց մի փաստաթղթի տակ, որտեղ ամրագրվում է ՀՀ սուվերեն տարածքով՝ Սյունիքի 43կմ-ոց ճանապարհով անխոչընդոտ երթևեկության հնարավորությունը։ Ստորագրությունը դնելով՝ Ադրբեջանը դարձավ այդ ճանապարհի փայատերը։

ԱՄՆ նախագահը բավարարվեց անձնապես, և այդ շոուի ժամանակ էլ այդ մասին խոսեց՝ Նոբելյան մրցանակի, «խաղաղարար լինելու» մասին։ Ինչպես նաև Իրանի սահմանին մոտ լինելը՝ ԱՄՆ տնտեսական ու ռազմաքաղաքական նեկայությունն այնտեղ տեղավորվում է ԱՄՆ արտաքին քաղաքականության ու ռազմավարության մեջ։

Բավարարվեց նաև Նիկոլ Փաշինյանը, որովհետև առնվազն մի քանի ամիս փորձելու է ժողովրդին խաբել ինչ-որ թուղթ նախաստորագրելու հարցում, իսկ դա ոչինչ չի նշանակում, որովհետև Ադրբեջանը շարունակում է իր պահանջները»,- նշեց Մանուկյանը։

Նա նաև հավելեց, որ մարդկանց մոտ 2025 թվականին հարց է առաջանում՝ ո՞ւր է քո խաղաղությունը։ «Իշխանությունն օգտագործում է այդ բառախաղը, թե պատերազմ չի լինելու, խաղաղություն է լինելու, բայց այս պահին պատերազմի իմաստ չկա, որովհետև Ադրբեջանը ստանում է այն ամենը, ինչ պահանջում է Նիկոլ Փաշինյանից»,- նշեց պատգամավորը։

Նրա գնահատմամբ՝ ամենավտանգավորն այն է, որ ՀՀ-ի և Ադրբեջանի արտգործնախարարները ստորագրեցին Մինսկի խմբի լուծարման հարցով հանատեղ դիմումը։