«Այսքան աղետներից հետո ի՞նչ իմաստ ունի հավատալ իշխանության խոստումներին»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը․ «Ինչքան ընկել է Հայաստանի, որպես պետություն, սուբյեկտությունը, այնքան ուշադիր ենք հետևում Հայաստանի վերաբերյալ ուրիշների բանակցություններին, տագնապով ենթադրում, թե մեր մասին ինչ են խոսել Թրամփն ու Պուտինը, խոսե՞լ են արդյոք։ Իշխանական քարոզիչները հազար ու մի մանիպուլյացիաներով հավաստիացնում են, թե «Թրամփի ուղին» ամենևին միջանցք չէ, որ դա եղած տարբերակներից լավագույնն է, իսկ Թրամփն էլ Վաշինգտոնում Հայաստանի ու Ադրբեջանի միջև ձեռք բերված պայմանավորվածության երաշխավորն է։ Ցանկացած պայմանագիր, փաստաթուղթ գործում է այնքան ժամանակ, երբ դրան պարտադրող ուժեր, պետություններ, միջազգային կազմակերպություններ, ոչ թե լիդերներ, անհատներ կան, իսկ այդքան սիրված, գովերգված խաղաղությունը ընդամենը կարճ կամ երկար դադար է պատերազմների արանքում։ Հետո հիշում եմ, թե 2018-ին իշխանությունը ինչ ոսկե սարեր էր խոստանում Հայաստանի հանրությանը, և ուր հասանք 7 տարի հետո: Ու այսքան աղետներից հետո ի՞նչ իմաստ ունի հավատալ այդ իշխանության խոստումներին»։