«Պետք է սորտավորել և «արևմտամետ» որակելուց զատ ենթատեսակը ցուցանել»․ Ստեփան Դանիելյան

Քաղաքագետ Ստեփան Դանիելյանի ֆեյսբուքյան գրառումը․ «Ամեն ինչ խառնվել է իրար ու անհասկանալի է, թե «արևմտամետ» ասելով ինչ ենք հասկանում։
Օրինակ, արևմտամետների մեջ կա ենթատեսակ՝ ամերիկամետ, բայց դա էլ միանշանակ չէ, որովհետև կա «հանրապետական-ամերիկամետ» և «դեմոկրատ-ամերիկամետ»։ Եթե խորանանք, դրանցից յուրաքանչյուրը նույնպես ենթատեսակների է բաժանվում, բայց հիմա շատ չբարդացնենք առանց այն էլ մեր բարդ կյանքը։
Նույնը վերաբերվում է արևմտամետ- եվրոպամետներին, որոնց մեջ կան հունգարամետներ, սլովակամետներ, լեհամետներ, ֆրանսիամետներ, իտալամետ-ադրբեջանանավթագազամետ, եւրոբյուրոկրատամետներ եւ այլն։ Դրանց միջև եղած տարբերությունները հիմնարար են։
Կա նաեւ մի յուրահատուկ եվրոպամետների տեսակ՝ բրիտանամետ-թուրքամետ։
Առանձնահատուկ արևմտանետներ են նաև իսրայելամետ-ադրբեջանամետները։
Ամբողջ խնդիրն այն է, որ ներտեսակային պայքարն ավելի սուր է լինում և այդ տեսակները ոչ միայն միմյանց հետ են հակամարտության մեջ, այլեւ, մասնավորապես, Կովկասում տարբեր նախագծեր են փորձում իրականացնել, երբեմն՝ իրարամերժ։
Հիմա մենք լուրջ մարտահրավերի առջև ենք կանգնած, պետք է հասկանանք, թե Հայաստանում գործող տարբեր արևմտամետներից յուրաքանչյուրը որ տանիքի տակ է գործում։ Դրա համար պետք է հստակ սորտավորել և «արևմտամետ» որակելուց զատ պետք է նաև ենթատեսակը ցուցանել։ Առանց դրա մի տեսակ հեղհեղուկ և լղոզված է հանրային-քաղաքական դաշտը ընկալվում, կամ ավելի ճիշտ՝ ոչինչ էլ չի ընկալվում»։