«Սկզբում քանդում են, հետո հայտարարում, թե կանգնեցրին քանդման գործընթացը»․ Լևոն Զուրաբյան

ՀԱԿ-ի ֆեյսբուքյան էջում հրապարակվել է ՀԱԿ փոխնախագահ Լևոն Զուրաբյանի հարցազրույցից մի հատված, որում ասված է․ «Առաջին հերթին մենք ընդդիմանում ենք ոչ թե ընդունված համաձայնագրին, այլ, այն ստոր ցինիզմին ու խաբեությանը, որով այն ներկայացվում է որպես հրաշալի լուծում Հայաստանի համար։ Փաշինյանի ամբողջ պրոպագանդան ասում է՝ իբր իրենք կարողացան անել այն, ինչը ոչ ոք չէր կարողացել անել։
2018 թվականից սկսած՝ իրենք իրենց իսկ որոշումներով Հայաստանը հասցրել են այնպիսի վիճակի, որ այժմ ստիպված ենք ընդունել ամենանվաստացուցիչ ու վնասակար լուծումները՝ ավելի վատից խուսափելու համար։ Եվ սա մատուցվում է որպես «մեծ նվաճո՞ւմ»:
Այսինքն, սկզբում քանդում են ամեն ինչ մինչև վերջ, հետո հայտարարում են, թե իբր կանգնեցրին քանդման գործընթացը: Այնինչ, նույնիսկ դա չեն կարող պնդել, քանի որ քանդման գործընթացի վերջը դեռևս չի երևում։
Նիկոլ Փաշինյանի քաղաքականության ամբողջ էությունը հետևյալն է՝ սկզբում ձախողել, հետո բացատրել, որ ստեղծվել է մի իրավիճակ, որտեղ անհրաժեշտ է իջեցնել նշաձողը։ Հետո կրկին ձախողել ու ասել, որ պետք է էլի իջեցնել նշաձողը։ Վերջում, հասցնում է մի կետի, երբ ժողովուրդը կամաց-կամաց սկսում է մարսել նշաձողերի իջեցումը, մինչև այն հասնում է գետնին, և մեր պետությունից այլևս բան չի մնում։
Այո, անհրաժեշտ է խաղաղություն ու կայունություն հաստատել, բայց ոչ՝ ինքնության հաշվին։ Եթե պետությունը կոչվելու է Հայաստան, բայց այլևս չի լինելու «հայերի երկիր», ապա անունը ի՞նչ արժեք ունի։ Կան սահմաններ, որոնք անցնելու դեպքում պետության բովանդակային իմաստն է կորում:
Այո, կարելի է գնալ զիջումների ու կոմպրոմիսային լուծումների, բայց գոնե պահպանելով մեր ներքին ինքնիշխանությունը՝ որպես անկախ պետություն»։