«Այդ օրը Երևան եկած արցախցիներն ի՞նչ են զգում հիմա»․ Կարեն Վրթանեսյան

Ռազմական փորձագետ Կարեն Վրթանեսյանի ֆեյսբուքյան գրառումը․ «Ուղիղ 7 տարի առաջ այս օրը Հանրապետության հրապարակում Նիկոլը «100 օրվա» հանրահավաք էր անում։ Հանրահավաքը սկսեց թվարկումով, թե հայության որ խմբերի, Հայաստանի որ մասերից են մարդիկ եկել, որպեսզի շեշտի ժողովրդի միասնությունը։ Առաջիններից նշեց արցախցիներին.
— Այսօր, այս հրապարակում են գտնվում Արցախի Հանրապետությունից ժամանած հազարավոր մեր հայրենակիցներ, — գոռում էր Նիկոլը բեմահարթակից։
Հիշում եմ նաև, որ այդ օրը հանրահավաքից առաջ, թե հետո երաժշտություն էին միացրել ու շրջակա թաղերը թնդում էին «Հայե՛ր, միացե՛ք, միացե՛ք, հայե՛ր։ Արցախն է մեզ կանչում, օգնության հասեք» երգի բառերից։
Մարդ գտներ այդ օրը Երևան եկած արցախցիներին, հավաքեր իրենց պատմությունները, հարցներ, թե ինչ էին զգում այդ օրը հրապարակում կանգնած, ինչպես էին վերաբերվում Նիկոլին սկզբում, ինչ հույսեր էին կապում իր հետ, ինչ վախեր ունեին, ինչով անցան այս 7 տարում և ինչ են զգում հիմա...
Ու եթե մի «ակադեմիական լրատվամիջոց» լիներ, այդ ամբողջ նյութն իրար գլխի բերելով նույնիսկ ոչ թե մեկ ֆիլմ, այլ վավերագրական մի սերիալ նկարահաներ՝ շատ կարևոր ու ազդեցիկ։
Բայց քանի որ մտքիս այդպիսի լրատվամիջոց չկա, ապա գաղափարը նվիրում եմ։ Միայն եթե որոշեք իրականացնել, խնդրում եմ գռդոն չանել»։