Վանեցյանին նախկին ՕԵԿ-ականներ են միացել. «Ժողովուրդ»

«Ժողովուրդ»-ի լավատեղյակ աղբյուրները փոխանցում են, որ «Հայրենիք» կուսակցության ղեկավար Արթուր Վանեցյանը վերջին ժամանակահատվածում ակտիվ հանդիպումներ է ունենում տարբեր անձանց հետ՝ 2026 թվականին կայանալիք խորհրդարանական ընտրությունների առնչությամբ: «Մենք տեղեկություններ էինք ստացել, որ Վանեցյանը վերջերս հանդիպել է անգամ «Օրինաց երկիր» կուսակցության նախկին ներկայացուցիչների հետ: Ըստ տեղեկությունների՝ առաջիկա ընտրություններին նրանք ևս լինելու են «Հայրենիք» կուսակցության շարքերում, որին «Հայրենիք»-ը կմասնակցի միայնակ: Թե որքանով են իրական այն տեղեկությունները, որ «Հայրենիք» կուսակցությունը պատրաստվում է 2026 թվականի խորհրդարանական ընտրություններին նախընտրական ցուցակում ներառել նախկին ՕԵԿ-ականների, որոնք նաև պատգամավորներ են եղել, փորձեցինք ճշտել «Հայրենիք» կուսակցության խորհրդի անդամ Սոս Հակոբյանից:
««Հայրենիք» կուսակցության նախագահ Արթուր Վանեցյանը բազմիցս հայտարարել է, որ կուսակցությունը պատրաստվում է մասնակցել առաջիկա խորհրդարանական ընտրություններին։ Կարծում ենք՝ հանրության համար որոշակի չափով տեսանելի են նաև կուսակցության կազմակերպական աշխատանքների իրականացումը և կուսակցական կառույցների աշխարհագրության ընդլայնումը։
Այս գործընթացում «Հայրենիք» կուսակցությանն են անդամագրվում ՀՀ բազմաթիվ քաղաքացիներ, մի շարք քաղաքացիներ էլ, հայտնելով իրենց աջակցությունը, պատրաստակամություն են հայտնում ներգրավվելու կուսակցական-քարոզչական աշխատանքներին։ «Հայրենիք»-ի թիմի մեծացման գործում մեզ համար երբեք չեն եղել ի սկզբանե դրված խտրական արգելքներ՝ քաղաքացու՝ ժամանակին այս կամ այն կուսակցությանը կամ քաղաքական հոսանքին հարելու հիմքով, եթե, իհարկե, տվյալ անձի հետ ընդհանուր առմամբ առկա է համաձայնություն կուսակցության քաղաքական կողմնորոշման, սկզբունքների, գաղափարների վերաբերյալ, եւ կա որոշակի փոխադարձություն հայտնվող տեսակետների ազնվության հարցում։
Վերը նշվածով՝ Ձեր կողմից բարձրացված հարցին անդրադարձանք առավել ընդհանրական եղանակով: Այնուամենայնիվ, Ձեր հարցին առավել որոշակիությամբ պատասխանել չենք կարող, քանի որ «Հայրենիք» կուսակցությունում այս պահի դրությամբ նախընտրական որևէ ցուցակի և դրանցում անձանց ներգրավվածության հարցեր չեն քննարկվում»,- նշել է Հակոբյանը»։

Մանրամասները՝ թերթի համարում։